Silap pissusaa kalaallit oqallisigingaatsiarpaat
Silap pissusaa pillugu Københavnimi ataatsimeersuarnissaq qanilliartuinnartillugu pingaaruteqarpoq Danmarkimi naalakkersusiut paasitissallugit Kalaallit Nunaata CO2-mik aniatitsisinnaanerunissaa pingaaruteqartoq.
Nunatta Folketingimut ilaasortaatitai oqalugiaamminni tamanna aamma pingaartuutinnerarpaat. Atlantikup Avannaani suleqatigiissitami ilaasortatut Juliane Henningsenip, Danmarkip Silap pissusaanut ministeriata Connie Hedegaardip apeqquteqaateqarfigineqarnissaa kissaatigisimavaa, naalagaaffeqatigiinnerup iluani isumaqatigiissutit suut isumaqatigiissutigineqarsimanersut erserissarneqarnissaat kissaataalaalluni:
- Naalagaaffeqatigiinneq tassasaginnanngilaq Danmarkip. Tamanna ersarissarneqartariaqarpoq, pissutigalugu Danmarki Naalagaaffiit Peqatigiit peqatigalugit ataatsimeersuartitsilerpat isumaqatigiissummillu suleqataalerpata aamma Nunarput Savalimmiullu tassani ilaammata, Juliane Henningsen oqarpoq.
Kalaallit Nunaata CO2-mik aniatitsisinnaanerusinnaanissaa, Lars-Emil Johansenip Folketingimit sulinngiffeqarnerata nalaani taartaasup Doris Jakobsenip aamma kissaatigaa, Kalaallit Nunaannut tunngasunut ataatsimititaliaq aqqutigalugu kiisalu Socialdemokratit sunniiniarfigalugit tamanna anguniarneqassalluni.
- Kalaallit Nunaata CO2-mik aniatitsisinnaanerusinnaanissaa Danmarkip aamma soqutigisaqarfigaa, aningaasarsiorsinnaanissarmi matumani qitiuvoq, Doris Jakobsen oqarpoq, nangillunilu:
- Nunarput Namminersulermat pingaaruteqarpoq eqqaassallugu kiffaanngissuseqarneruleratta, kisianni aamma Namminersulernitsinni piumasaqaataavoq Nunatta aningaasat tungaatigut imminut aqussinnaanerulernissaa. Taamaammat ineriartortitsinikkut piumasaqaatiginiarparput soorlu aatsitassarsiornikkut pisariaqartitsisugut kiisalu Silap pissusaa pillugu ataatsimeersuartitsinissaq sioqqullugu isumaqatigiissusiornissamik pisariaqartitsisugut, Folketingimut ilaasortaagallartoq Doris Jakobsen taama oqarpoq.
