Silap erseqqarlusseriataarnera qulimiguullip nakkarneranut pissutaagunarpoq
Ajutoortoqarsimatillugu pisortatigoortumik misissuisartut uppernarsaataasinnaasut qulimiguulimmeersut katersoreerpaat, qulimiguulillu maanna nuunneqarsinnaanngorluni.
Air Greenland tusagassiutinut taama nalunaaruteqarpoq.
Ajutoornermi ajoqusertoqanngilaq, qulimiguulimmillu aquttoq, nunamilu isiginnittut pisariaqartitaq naapertorlugu ikiorserneqarnissamik neqeroorfigineqarlutik.
- Misissuinerup ilimanarsitippaa qulimiguulik assartuitilluni qaqqap qaani erseqqarlusseriataarnera peqqutigalugu aquttua sumiiffeeruttuullatsiarsimavoq. Nunami sulisut ajoquserniarnagit aquttup qulimiguulik sumiffimmiit nigortertittariaqarsimavaa, sakkortuumik minnermik kinguneqartumik, Air Greenland taama oqarpoq.
Kingorna taava annaassiniartoqarpoq, ajutoornermilu ornigasuartinneqartartut Air Greenlandimit sumiiffimmut aallartinneqarlutik.
Qulimiguullip ajoqusersimanerata annertussusaa misissuiffigineqareerpaat aatsaat nalilerneqarsinnaavoq, pisortallu Air Greenlandillu misissuinerat aallartinneqareerlutik.
