Silap allanngoriartornerata kinguneranik qimaasoqartalissaaq
EU-mi isumalioqatigiissitap nalunaarusiaa naapertorlugu silap pissusaata allanngoriartornerata kinguneranik Afrikamiit Kangianiillu Qiterlermiit nunanut allanut nussortorpassuaqalernissaa siuttuutigineqarpoq.
Naalagaaffeeraq, Tuvalu, Australiap avannamut kangisinnerusortaaniittoq, qeqertani qulingiluani inissisimavoq. Silap pissusaata allanngoriartornera pissutigalugu imaq qaffakkiartulerpat Tuvalumi innuttaasut 12.000-it allamut nuuttariaqassapput, qeqertammi annersaat meterinik marluinnarnik portutigipput.
Tuvalumi innuttat siunissami qimaasariaqartussat nutaat; silap allanngoriartornerata kinguneranik qimaasussat ilaminiinnannguarissavaat. Inuppassuimmi, anorersuit, qarsutsinerit panernersuaqarnerillu pissutigalugit qimaasalertussaassapput. Taamaalippat naalagaaffiit sorliit qimaasunik isaatitsisinnaassanersut apeqquterujussuanngussaaq. Immikkummi pissutsinik ilisimannittut siuttuutigaat inuit milliuunit 200-t 250-illu missaaniittuut angerlarsimaffimminniit qimaguttariaqassasut. Andrew Simmons, Tuluit isumalioqatigiissitaanneersoq oqarpoq, siuttuutigineqartut piviusunngorpata pisuutinneqannginniassagamik politikerit maanna eqqartuerratilersut. EU-mi isumalioqatigiissitap nalunaarusiaa naapertorlugu naalagaaffiit EU-mi ilaasortat qimaasorpassuarnik isaatitaqalernissaminnut piareersalereesinnaasut. Naalagaaffiit Peqatigiit, FN-ip ataani qimaasunik isumaginnittut, ullumikkut inunnik politikkikkut eqqarsartarnertik pissutigalugu qimaasut isumaginiarlugit ulapereeqaat, silallu kissakkiartornera pissutigalugu angerlarsimaffimminniit nuuttariaqartut aamma qimaasutut isigineqassanersut apeqquserneqarpoq.
Tuvalumiit Australiami naalakkersuisut aperereeraluarput Tuvalumiut 12.000-it Australiamut nuussinnaassanersut, sulili akineqanngillat. Tuvalumiut ukiumut 75-it New Zealandimut nuuttarput, naalagaaffippassuilli assigalugit New Zealand silap kissakkiartornera pissutigalugu qimaasariaqartussat pillugit suli periusissaminnik aalajangersuinngillat.
