Silap allanngoriartorneranut inuit pisuunnginnerarpaat
Nunani tamalaani nutaamik isumasiuinermi paasinarsivoq, nunarsuatta inui 10 procentit missaanniittut isumaqartut, silap pissusaata allanngoriartornera nunarsuup pissusissamisoortumik kaaviiaartuarneranik pissuteqartoq, uagullu inuit mingutsitsinitsinnik pissuteqanngitsoq.
Taamatullu isumaqartut ukiut marluk matuma siornagut isumasiuinermut sanilliullugu amerleriaateqarluarput. Taamanikkummi 6 procentit isumaqarmata silap pissusaata allangoriartornera pinngortitap nammineq pilersitarigaa.
Isumasiuinermi nutaami nunat 18-it peqataatinneqarput, taakkununnga ilaallutik USA aamma Kina, inuillu katillugit 13.000-it isumasiorneqarsimapput.
Isumasiorneqartulli amerlanerpaartaat - tassa 90 procentit - isumaqarput nunarsuup kiatsikkiartornera inunnit pilersitaasoq, taamaattumillu suliffeqarfiit CO2-mik mingutsitsinerminnik killiliiniarlutik iliuuseqarnerusariaqartut, nutaarsiassaqartitsivik Ritzau taama ilisimatitsivoq.
