Silap allanngoriartornerani iliuusissanut pilersaarusiornissaq ICC-p kaammattuutigaa
Ataatsimeersuarneq qulequttat ilagaat “Issittumi silap allanngoriartornera", Aqqaluk Lyngelu tassanerpiaq inernileeqataagami, silap allanngoriartornerata issittup inuinut sunniutai oqaluttuarai, Iliuusissanullu pilersaarusiornissamik kaammatuilluni.
- Ulluinnarni inuunitsigut sorpassuartigut sunnigaasussaagatta, silap allanngoriartornera upalungaarfigissariaqarparput. Piareersimaniarlutalu ilisimasat annertunerit politikikkullu eqiinganeq pisariaqartittorujussuuagut. Tassami nunatta sineriaallu uatsinnut pisuussutinik assigiinngitsorpassuarnillu tunniussuisarsimasut sakkortuumik allanngoriataassappata, tamanna anersaakkut kulturikkullu inuunermik allannguinermik kinguneqartussaavoq, Aqqalu Lynge oqarpoq.
Taassuma oqalugiarnermini ilisimatuunut kaammattuutigaa, Inuit issittormiullu allat misilittagaannut ilisimatuut tusaaniarnerussasut.
- Sualummik ukiut marluk issittumut ukiorititaasut ilisimatuut nunatsinni sulillutik atorluarpaat. Kisianni aamma maani najugaqartut namminneq ilisimasaat aamma aallaavigalugit misissuinerit tamakku ingerlanneqartariaqarput.
Aamma qallunaat anorisaatinik innaallagissiornermut nunarsuarmi siuarsimanerpaasut tusartuarparput. Aperisariaqarpugulli, sooruna qallunaat suleqatigisinnaanngikkivut tamakkua nutaaliorfigalugit, soorlu nunaqarfiit illoqarfiillu anorisaatinik pilesorneritigut? Nunatsinnut naleqquttumik teknikkikkut akikitsunik pitsaasunillu nukissiornermut atorsinnaasatsinnik amigaateqaratta, Aqqaluk Lynge oqarpoq.
