Silap allanngoriartornera pillugu kalaallit danskillu suleqatigiinniarput

Silap allanngoriartornera nunarsuatsinni Danmarkimilu oqallisaasorujussuanngorpoq, nunarpullu kissakkiartornermut uuttuutitut isigineqarmat, danskit naalakkersuisui nunat allat siuttuinik sermersuatsinnut aakkiartortumut takuniaasitsisaqattaalerput. Nunat allat siuttui takuniaarusuttut danskit naalakkersuisuinuunngitsoq nunatsinnili naalakkersuisunut saaffiginneqqaartalernissaat suleqatigiinnerunissarlu isumaqatigiissutigineqartut Avatangiisinut Naalakkersuisoq Arkalo Abelsen oqarpoq.

- Danmarkimi naalakkersuisoqatigut isumaqatigiissuteqarfigaavut ima; siunissami avataaniit tutsiuttoqaraangat uatsinnut toqqaannarnerusumik innersuunneqartassasut, tassami uagut Nunatsinni avatangiisivut nammineerluta oqartussaaffigaagut.

Danskit ministeriunerat Anders Fogh Rasmussen tyskillu kansleriat Angela Merkel qanittukkut Ilulissaniimmata Naalakkersuisutta oqaloqatigilluarsimavaat. Arkalo Abelsen:

- Isumalluarnartorujussuarmik suleqatigiinnissaq oqaloqatigiissutigaarpugut.

Kyotomi isumaqatigiissutip taartissaa pillugu Københavnimi 2009-mi ataatsimeersuartoqassaaq, ataatsimeersuarnissamullu piareersarnernut kalaallit qanoq annertutigisumik peqataanissaat kalaallit danskillu oqaloqatigiissutigissavaat.

Arkalo Abelsenip danskit avatangiisinut ministeriat Connie Hedegaard, nunat avannarliit avatangiisinut ministeriisa Finlandimi Helsinkimi qaammatip uuma naalernerani katersuuppata suleqatigiinnissaq pillugu oqaloqatiginiarpaa.