Silap allanngoriartornera kigaallatsissinnaavaa
Qaqqap innermik anitserujussuarnerata kingornagut ukiuni sila gradinik marlussunik nillertikkumaartoq ilisimatusartut siumut paasivaat, tassami innermik anitsisup qullaatsitaasa nunarsuaq seqernup qinngornerinut taallersimammassuk.
Taamatullu aamma pisoqassasoq, USA-mi Los Alamos National Laboratorymi, silap pissusaanik ilisimatusartoq Sebastian H. Mernild oqarpoq.
- Qaqqaq innermik anitsisinngikkallarmat Europap avannaani qaammatit tulliuttut marlussuit ingerlaneranni silap takusartakkatsinninngarnit nillernerunissaa naatsorsuutigisinnaavarput, taama oqarpoq.
Innermik anitsisoqaraangat taamaattumik sermersuaq sivisunerusumik atasarpoq.
- Kiassutsip ississutsillu allanngorarneri aputip sermillu aakkiartortarnerannut pingaaruteqarput imerlu sermersuarmit aalluni kuuttoq qaqqap innermit anitsinerata kingornagut nillernerulernerullu kinguneranik 30 procentinik annikinnerulissalluni, Sebastian H. Mernild oqarpoq.
Islandimi Eyjafjallajökullimi qaqqap innermik anitsinera qanoq annertutiginersoq oqaatigiuminaappoq. Sivisunaarneruguni anitsinera sakkortunerullunilu, pujoralaqarnerussaaq aalarlu annertunerusoq nunarsuup silaannaartaanut ingerlatinneqassalluni.
- Silamut annertunerusumik sunniuteqassaaq. Islandimi qaqqap innermik anitsisup siunissami silamut sunniutissaata qanoq annertutiginissaa oqaatigissallugu suli ajornakusoorpoq, qaammatilli marlussuit ingerlaneranni pujoralassuaq Europap qulaaniissaaq nillernerulersitsillunilu, ilisimatusartoq oqarpoq.
