Silap aasaanerani assakaasuilersuinissat kinguartikkai
Silarsuaq kisimi naalagaavoq! Nunatsinnilu biilit assakaasuisa ukiorsiutaat qaqugu taarserneqarnissaannut apeqqummut aamma tunngavoq.
Allattoq Karsten Sommer
Malittarisassat naapertorlugit aasaanerani assakaasunut maajip aallaqqaataatinnagu taarsiisoqassaaq.
Igalaakkulli qiviaraanni piviusoq ulluni makkunani allaavoq.
Taamaammat politiit ukiuunerani assakaasut maajip 15-iata tungaanut ukioq manna atasinnaatitaasut nalunaarutigaat.
Taama aalajangiineq nunatsinni kommunini oqartussanit tallimaasunit sisamat isumasioqatigineratigut pivoq.
Kommune Kujalleq immikkut akuersissuteqarnermut taamaallaat ilaatinneqanngilaq. Taamaammat Kujallermi najugaqaraanni biileqaraannilu aasaanerani assakaasunut apriilip 30-aatinnagu taarsiisariaqarpoq.
Taamaaliunngikkaannilu akiliisitsisoqarsinnaasoq, Sermersuumi politiit ullumi allapput.