Silamiut aamma Katuaq isumaqatigiissusiorput
Katuami pisortaq Julia Pars, isumaqatigiissut pillugu oqarpoq, isumaqatigiissuteqarnikkut kalaallit isiginnaagassiaasa amerlanerusut takutinneqartarnissaat kissaatigineqartoq, aamma soorlu takornariarpassuarnut aasakkut Nunatsinniittartunut aasaanerani isiginnaartitsisarnissaq periarfissarsiuunniarneqartoq.
Aamma Julia Parsip erseqqissarpaa, kulturikkut ineriartortitsinissamut aningaasat killiliisuuppata suleqatigiissinnaanissaq ataatsimullu siunnerfiusunut isumaqatigiissinnaanissaq pingaaruteqartut.
Silamiut ukioq manna naatinnagu meeqqanut isiginnaagassianik marlunnik Katuami isiginnaartitsiniarput. Siulleq tassaalluni "Karius aamma Baktus", novembari qiteqquppat takuteqqaarneqartussaq aamma juullilerpat Silamiut juullip oqariartuutaanut tunngasumik, juullip iivangkiiliua tunngavigalugu isiginnaagassiorniarput.
