Silaarulluni USA-mi aallaasersortoq kinaanersoq suli isertuuppaat
Angut USA-mi naalagaaffimmi Virginiami Universitetimi silaarulluni ippassaq aallaasersormat inuit 33-t toqutaapput, ikinnerpaamillu 15-it ikiligaallutik.
Toqoraanersuarmulli, amerikamiut atuarfiini aatsaat taama amiilaarnartigisumut, suna pissutaanersoq, suli paasineqanngilaq:
Angutilli pinerluttup aqqa politiit ullaaq manna suli saqqummiutinngilaat – angut asiamiunit kingoqqisuuvoq, toqoraanermi kingorna imminut toquttoq. Toqoraanersuarmut suna pissutaanersoq kimilluunniit ilisimaneqanngilaq.
USA-mi taama aallaasersortoqarsimatillugu sakkunik imaaliallaannaq pissarsisinnaaneq atuisinnaanerlu pingaarnertut patsisaatinneqartarpoq.
Sakkuuteqarnissamut USA-mi soqutigisaqaqatigiiffiup pissaanilerujussuup aalajangernikuuvaa sakkuuteqarnissaq inatsisinit tunngaviusunit illersugaasoq, præsident George W. Bushillu, ippassaq toqoraanersuup kingorna, erseqqissaatigaa, ”kikkulluunniit sakkoqarnissaminnut pisinnaatitaasut, inatsisilli tamarmik malinneqartariaqartut”.
Isiginnittut aamma tikkuarpaat iluatsitsilluarnissamik amerikami inuiaqatigiinnut piumaffiginnittarneq inunnit immaqa naqisimaneqartutut misigisimasunit sakkortuuliornermik kinguneqarsinnaasartoq.
