Silaannartaq suli matoqqavoq, aqaguli ammaqqissaaq

Qaqqap innermik anitsup qullaassaasa Kalaallit Nunaata silaannartaa ullumi sisamanngornermi maajip 26-ni matuaa. Tallimanngornermi maajip 27-ni Atlantikoq qulaallugu timmisartuussinissat ingerlanneqarnissaat natsorsuutigineqarpoq. Ilaasussat 600-t missaanniittut eqqugaapput, assartugassallu 10 tonsit tungaanut amerlassusillit suli apuunniagassaallutik.
Allattoq Najaaraq Egede
maajip 26-at 2011 14:10

Air Greenland ilaatigut ima allappoq:

"Kalaallit Nunaata silaannartaa sisamanngornermi maajip 26-ni sukkasuumik matujartorluni matuvoq. Tamatumalu nassataanik nunatsinni piffinni assigiinngitsuni ilaasut arlallit nassiussallu ingerlaqqissinnaajunnaaqqapput, ilaat ataasinngormat maajip 23-anili. Pisumi matumani ilaasut 600-t missaat eqqugaapput.

Massakkumut missingersuutit naapertorlugit Air Greenlandip tallimanngornermi maajip 27-ni timmisartuussinissat pilersaarutaasut ingerlanneqarnissaat naatsorsuutigaa. Ullumi maajip 26-ni timmisartuussinerit tamarmik unipput.

Tallimanngornermi maajip 27-ni Danmarkimiit Danmarkimullu angalasussat angalanissamut pilersaarut naapertorlugu aallariartuinnassapput. Qullaassallu pissutigalugit kinguaattooqqasut inissallit aamma attavigineqalerput.

Air Greenlandip timmisartuussinerit ingerlaqqissinnaaleriarpata sapinngisaq tamaat atorlugu ilaasussat piaarnerpaamik apuunniassavai. Sapaatillu akunnerata naanerani timmisartuussinissanik pilersaaruteqareerpoq.

Malugeqquarput tallimanngornermi maajip 27-ni timmisartuussinissat massakkut missingersuutit tunngavigalugit aalajangigaammata. Erseqqissarneqarporlu pisut nalunaaquttap akunnerata ataatsip ingerlanerani allanngorartuarmata, pilersaarusiornissamullu tunngavigiuminaallutik.

Kangerlussuarmi nassiussat Nuummut ingerlassassat 6,9 tons-it Avannaanullu 2,5 tons-it uninngapput."

Aamma atuaruk