Silaannarmi qaamasoq
Pisoq videoliarineqarsimavoq, video immiussaq takoreerlungu, Statens Naturhistoriske Museum naliliivoq ikumasoq qilammiit nakkartoq tupinnartoqanngitsoq.
- Timmisartumuna aqua seqernup tarrilernerata nalaani assilineqarsimasoq. Seqineq tarrileraangami imaluunniit nuileraangami assut sakkortuumik qinngorneqartarpoq, taamaammanuna sakkortusoq. Takuneqarsinnaavoq arriitsunnguamik ingerlaartoq, taama nassuiaavoq Henning Haack Danmarkimi Statens Naturhistoriske Museumimeersoq.
Tassa qilammi takussaasoq tassaanngilaq ikumasoq nakkariartortoq, kisiannili pilersinneqarsimalluni timmisartup aquata pujuata seqinernullu qinngornerata akulerunnerannit qaamaneq pinngortoq.
- Aatsaat taama isumaqartoqanngilaq, takuneqarsimasormi seqernup qinngornerata sakkukillilernerani sakkortusimagami, Henning Haack oqarpoq.
Timmisartup takuneqarsimasup motoria aquaniippoq. Timmisartup motorianiit kingornani pujuusannguuttoq seqerngup qinngorneralu akulerukkaangamik nunamiit isikkoqalersinnaasarpoq soorlu "ullorissap anaa" imaluunniit arlaat ikumasoq.
Kangilinnguani Sakkutooqarfiup, Mittarfeqarfiit Paamiullu mittarfiata oqaatingisinnaanngilaat timmisartoq sorleq takuneqarsimanersoq ilaasartaataanersoq imaluunniit sorsuutaanersoq.