Silaannaap ujarai nunatsinniittut
Ukiut 4,3 aamma 4,1 milliardit matuma siorna, Nunarsuup pinngoqqaarfiata nalaani, nunarsuaq silaannaap ujararpassuinik eqqugaasimavoq. Ilisimatuut tamanna uppernarsaatissarsisimavaat, videnskab.dk taama allappoq.
Allattoq Martine Lind Krebs, Simon Uldum
Nunarsuup silaannaap ujararujussuanik Marsitut angitigisumik eqqorneqarsimanera kingornalu ullorissanik pamiulinnik eqqugaasimanera qangaaniilli ilisimaneqarpoq. Ilisimatusarnerullu nutaap danskinit peqataaffigineqartup takutippaa, taakku pisut akornanni nunarsuaq aamma allamit eqqugaasimasoq.
Kalaallit Nunaanni ujaqqanik misissueqqissaarnikkut ilisimatuut tamanna paasisimavaat. Silaannaata ujarai nunarsuup qaavani saffiugassanik oqimaatsunik amerlasuupilussuarnik nassataqarsimapput.
Ilisimatuussutsikkut paasisat atuagassiami Nature Geosciencemi saqqummiunneqaqqammerput.