Silaannaap rockia

Tusartarparput silaannaap allanngoriartorneranik unikaallatsitsiniarluni suliniutinut paasinnittoqarnerulernissaa anguniarlugu issittumut imaluunniit Qalasersuarmut angalasoqartartoq, massakkullu periutsit allat atorlugit aamma paasisitsiniaasoqalerpoq.

Tassa nipilersorneq iluaqutigalugu silaannaap allanngoriartornera inuiassuarnut paasitinniarneqalerpoq, nipilersortartut erinarsortartullu nunarsuarmi tusaamasaasut assigiinngitsut, nunani assigiinngitsuni, aasaru julip ulluisa arfineq aappaanni ataatsikkut tusarnaartitserujussuartussanngortut nutaarsiassaqartitsivimmi Ritzaumi allaaserineqarpoq.

Nunat assigiinngitsut ataatsikkut tusarnaartitsiffiusussat taassapput Kina, Afrika, Australia, Tuluit Nunaat, Japani USA-lu.

Nunanit assigiinngitsunit piffissami aalajangersimasumi tusarnaartitsisussat tusaamasarsuit ilaatigut tassallutik, Red Hot Chili Peppers, Snoop Dog, Black Eyed Peas aamma Cheryl Crow.

Silaannaap rockianik taallugu juulip arfineq aappaanni tusarnaartitsinissarsuaq radiokkut tv-qarfitsigut internettikkullu toqqaannartumik malinnaaffigineqarsinnaasussaq akunnernik 24-inik sivisussuseqassaaq.

Tusarnaartitsinissarsuarmik aaqqissueqataavoq USA-mi præsidentiusimasup Bill Clintonip tullersortigisimasaa Al Gore suleqatigiissitarlu, nunarsuarmi tusarnaartitsinersuarnik aaqqissuussisartoq.

Silaannaap rockianik taallugu tusarnaartitsinissarsuarmut inuit 2 milliardit malinnaallutillu tusarnaarumaartut aaqqissuisut eqqoriaapput.