Silaannaap kissatsikkiartornera suli annertusioartorpoq
Gassit silaannarmik kissatikkiartortitsisartut silaannarmut anianerat suli annertusiartorpoq, Naalagaaffiit Peqatigiinni silamik ilisimatuut ukioq kingulleq allaaserisaannit suli annertunerungaartumik. Kisitsisit nutaat taama takussutissiisut, tusarfiit arlallit nalunaarput.
Tamanna ima paasineqassaaq, silap pissusilersuutaata allanngoriartornera ajorluinnartunik, eqqarsaatigineqarsinnaanngitsunilluunniit, nassataqartussanngortoq, Naalagaaffiit Peqatigiinni paasisimasaqarluartut taama oqarput.
Australiamiut ilisimatoortaasa CO² -mik silaannarmut aniatitsinermut tunngatillugu nutaarluinnarnik sumiiffinni sisamani misissukkaminnik, katersaat ilaatigullu nunat tamat ikummatissaqarniarnermik sullissiveqarfiinit misissuinerminni paasisaqarluarsimapput. Misissuisimanerillu taakkua Naalagaaffiit Peqatigiit siusinnerusukkut misissugarisimasaanut nalunaarusiukkani eqqartorneqaqisuni sanilliukkaanni maannakkut misissuisimanerit isumakulunnartoqarnerupput. Silannarmullu CO²-mik aniatitsineq Naalagaaffiit Peqatigiit nalunaarusiarisimasaani annertunerpaaffissaliisimaneq maannakkut misissuisimanerit takutippaat maannakkut killiffiusoq annertunerpaaffissaaniittoq.
Silaannarlu pillugu Naalagaaffiit Peqatigiinni ilisimasallit eqqarsaatigineqarsinnaanngitsunik pisoqaratarsinnaaneranik oqaatigisimasaat eqquukkaluttuarput, maannakkumiit CO²-mik silaannarmut aniatitsineq piaarnerpaamik qanoq iluuseqarfigineqanngippat.
- Tassalu ullumikkut ikummatissat atukkavut allanik mingutsitsinnginnerusunik taarserneqanngippata CO²-mik silaannarmut aniatitsinerit annertusiartuinnassapput.
Silaannarmut CO²-mik aniatitsineq qanoq kinguneqarsinnaanersoq aperisoqarmat avatangiisinut aqutsisoqarfimmeersoq, Kathrine Krogh Andersen, akivoq;
Silaannaap kisssatsikkiartorneranut atatillugu maannakkumiit qanoq iliuuseqanngikkutta 2000-kkunni silaannaq 4º-mik kissarnerulissaaq.
Naalagaaffiit Peqatigiit naliliisimanera malillugu CO²-mik silaannarmut aniatitsineq annikinnerulersinneqarsinnaavoq tamannalu akissaqartinneqartoq oqaatigineqarluni, misissuinerilli nutaat takutikkaat ullumikkorniit sukanerusumik gassinik silaannarmut aniatitsineq unitsinneqartariaqartoq.
