Silaannaap kissatsikkiartornera nunatsinnut iluaqutaasinnaavoq
Nunatsinni takornarniaqarneq silaannaap kissatsikkiartorneranit toqqaannanngikkaluartumik iluaquserneqarsinnaavoq.
Taama isumaqarput amerikamiut takornarniaqarnermik suliaqartut arlallit, nunatsinnut sapaatip akunnerani kingullermi tikeraartut.
- Nunarsuup kiatsikkiartornera massakkut sumi tamaani sammineqarpoq, ajornartorsiummullu tassunga nunarput inunnut amerlasuunut takussutissaavoq. Qularnanngitsumik inoqassaaq maanngarusuttunik, kissatsikkiartornerullu kingunerinik namminneq isiminnik takunnikkusuttunik, misigisassarsiorluni takornarniartitsiviup, Adventure Travel Associationip, siulittaasua, Shannon Stowell, oqarpoq. Aviisiliortut, takornarniaqarnermillu suliaqartut 75-it, Ilulissanut, Sisimiunut Nuummullu sapaatip akunnerani ataatsimi angalatinneqartut taassuma ilaaffigai.
Mathew Link, atuagassianut Newsweekimut aamma ForbesTravellerimut, ilanngussisartoq, Sermitsiami ullumikkut saqqummersumi aamma taama isummersorpoq.
- Silaannaap allanngoriartornera takornarniaqarnermi Kalaallit Nunaata aallunnerusariaqarpaa. Sermit iigartartut aakkiartortut takornarnianut takutissigik. Takornarniallu ilisimatusartunik maanimiunillu naapitsinissaannut periarfissillugit, taamaalillutik silaannaap allanngoriartornerata Issittumut sunniutaanik paasisaqarsinnaaqqullugit, Mathew Link Sermitsiamut oqarpoq.
Shannon Stowell isumaqarpoq silaannaap allanngoriartornera nunatsinnilu piniartutut inuutissarsiornermut sunniutai tupaallaatigineqassasut, aammattaarlu takornariat paasisimasaqarnerulernerannik kinguneqassasoq.
- Takornarniap, avatangiisinut soqutigisallip, paasiguniuk, nunatsinni inuit piniarnermik aalisarnermillu inuuniuteqartut – inuuniarnerallu navianartorsiortinneqartoq – tamanna sakkortuumik misigisaqartitsissaaq, tassami takornarniat taakku nerisassatik pisiniarfissuarmi nillataartitsivimmi pisiariinnarsinnaasarmatigik, Shannon Stowell oqarpoq.
