Silaannaap kissannera aalisartut iluaqutigaat

- Ukiariartornerani sila unerisimavallaarunnaarluni, qilalugarniarnerup nalaani sila pitsaanngilaq, imarluttarluni, immaqa tamanna peqqutigalugu qilalugartassat nugunneqanngitsoornikuupput, Upernavimmiu Knud Kleemann oqarpoq.

Qasigiannguani Jens Sandgreen silap pissusaata allanngorneratigut piniagassat takussaajunnaartut oqaatigai.

- Allanngortoqarpoq, soorlu appat takkutissaarnikuupput maanga ilusissumut ukiuni arlalinngortuni. Taakkuinnaanngitsut aamma tikaagullinnut arfernullu aamma sunniuteqarpoq arfernullu angisuunut, taakku maanga pulassaarnikuupput, Jens Sandgreen oqarpoq.

Tiniteqilaami piniartut puisip amiinik tunisisarnermikkut inuuniuteqarput. Aalisarnerlu isertitaqarfigissallugu periarfissaqanngilaq. Taamaalinerani sikusarunnaarnera piniartunut sunniuteqarnerluttoq Otto Larsen oqarpoq.

- Sikusarnera assorsuaq maqaasinarpoq. Soorlu 80-ikkut 90-ikkut missaanni ukiup taamaalinerani manna sikusarpoq, piniariarlunilu akunnagunnaartarluni. Massakkut akunnattuaannalerpoq, ukiullu taamaalinerani assorsuaq piniartunut eqquinerluttarpoq, Otto Larsen oqarpoq.

Sikuniapiloortarnera sikunngitsoortarneralu piniartut aalisartullu oqaluuserisarpaat, silalu unerisimajunnaartoq anorlerajullunilu piniartoq Otto Larsen oqarpoq. 

- Taava ukiuni kingullerni anorlernerulernera assorsuaq malugisatta ilagivaat, Otto Larsen oqarpoq.

Aalisartut sikussaarneranut naleqqussarput.

- Tassa umiatsiaq annerusumik atulernikuuarput umiatsiartarneq sivitsornikuungami. Taavalu imaatigut qassusersorneq puisinut, taanna aamma atungaasorujussuanngornikuuvoq, iluaqutaalluarami taanna, Upernavimmiu Knud Kleemann oqarpoq.

Sikussaarnera aalisarnermut iluaqutissartaqartoq, Jens Sandgreen  Qasigiannguaneersoq isumaqarpoq.

- Imaatigut aalisarneq eqqarsaatigalugu umiatsiaaqqallu mikinerusut eqqarsaatigalugit iluaqutissartaqarpoq taakku ataavarnerusumik aalisarsinnaanngussangamik, Jens Sandgreen oqarpoq