Silaannaap kissakkiartornera ilimagisamit sukkaneruvoq

Immap sikuata aakkiartuaarnerata silaannaap kissakkiartornera ilimagisamiit sukkanerusumik pilersissinnaavaa. Professor Søren Rysgaardip nunatsinni Pinngortitaleriffimmeersup, ilisimasassarsiornersuarmi Galathea 3-mi maanna pisortaasup, ilisimasassarsiortut arlallit peqatigalugit paasisimavaa, CO2-mik mingutsitsineq, inunnit pilersitaq, immap sikuanut aamma sunniuttartoq. Jyllands Posten ullumi taama allappoq. Immap sikuata siaruariartortarnera ukiuni kingullerni 30-ni 15-20 procentimik annikillisimavoq.

- Sikusarnera annikilliartuinnarpat CO2-mik imaanut mingutsitsisarneq aamma annikinnerulissaaq. Tamanna tassa ima isumaqassaaq, silaannarmut CO2-mik mingutsitsineq annertuseriassasoq, tamannalu tassa killormut sunniuteqariaannaavoq, Søren Rysgaard nassuiaavoq.

Søren Rysgaardip misissuinera naapertorlugu, CO2 0,2-p 0,5-illu gigatonsip akornanni annertutigisoq immap naqqanut ukiut tamaviisa kivisarpoq. Gassit silaannarmik kissakkiartortitsisarnerat, Kyotomi isumaqatigiissummi, 0,3 gigatonsimik annikillisinneqartussaavoq. Søren Rysgaardip allaaserisaa atuagassiami Journal of Geofysical Researchimi ullut arlaqanngitsunnguit qaangiuppata saqqummissaaq, tassani uppernarsarneqarpoq CO2 annertoorujussuaq immap sikuanit immikkoortinneqartartoq, immallu tarajua aqqutigalugu Qalasersuup Kalaallit Nunaatalu sineriaata imartaanut annguttarluni.