Silaannaap kiatsikkiartornera maluginiarneqarpoq

Nunat avannarliit killiit siunnersuisooqatigiiffiat Savalimmiuni Thorshavnimi ulluni makkunani ataatsimiippoq, ullumilu eqqartorneqarpoq silaannaap kiatsikkiartornerata nunanut avannarlernut qanoq sunniuteqarnera. Ataatsimiinnermilu peqataasoq Kuupik Kleist oqarpoq ilisimatuut inerniliinerisa uppernarseqqikkaat, silaannaap kiatsikkiartorneranut issitumut sunniutaasut.

- Uppernarsarneqaqqippoq issittoq aammalu nunat avannarliit killiit imartaat silaannaap allanngoriartorneranut qitiulluinnartut. Allanngoriartornerata nunatsinniit aallartittumik nunarsuatta sinneranut siaruaakkiartortarpoq. Nunatsinni imartatsinnit inuussutissarsiorneq pingaaruteqarpoq, taamaammat imartatsinnut silaannaap kiatsikkiartornera qanoq sunniuteqassanersoq, ilimatusarfigineqarnerusariaqarpoq, aningaasalersorneqarnerusariaqarlunilu. Kuupik Kleist oqarpoq nangillunilu: - Nunat allat misilittagaat paarlaateqatigiilluni pisarnissaat pingaaruteqarpoq, namminersornerullutillu oqartussat ilisimatusarnerunissamut aningaasaliinikkullu peqataanissaa pingaaruteqarpoq.

Kuupik Kleist taama oqarpoq.

Nunatsinniit peqataasut allat tassaapput, Kim Kielsen, Ruth Heilmann, Marie Fleischer, Juliane Henningsen, Ellen Christoffersen aammalu Anthon Frederiksen.