Silaannaap allanngoriartorneranut uagut inuit pisuuvugut

FN-imi silaannaap pissusaanik immikkut ilisimasallit una isumaqatigiissutigaat: Uagut inuit pisuussutigaavut panernersuit, qarsutsinersuit silallu pissusissarinngisaminik pissusilersortarnera. Sapaatip akunnerani uani silaannaap pissusaanik ilisimatusartut nuimanerit 500-t Parisimi ataatsimeersuarput. Ataatsimeersuarnermi FN-ip silaannaq pillugu paasisimasalittaannit nalunaarusiassarsuaq inaarsarneqaleruttorpoq. Nalunaarusiaq pissanngatigineqarluni utaqqineqarpoq aqagulu tallimanngornermi saqqummiunneqassasoq, nutaarsiassaqartitsivik Ritzau nalunaaruteqarpoq. Taamaattorli silaannaap pissusaanik ilisimatusartut 500-uusut ualimut isumaqatigiissutigaat, silaannaap allanngoriartorneranut sukkatsikkaluttuinnartumut, minnerpaamik 90 procentimik, inuup akisussaasuunera ilimanaateqartoq. Tamanna FN-ip nalunaarusiaanut 2001-imeersumut sanilliullugu qaffariangaatsiarneruvoq. Taamanimi ilisimatuut oqarput nunarsuup kiatsikkaluttuinnarneranut inuup pisuussuteqarnera 66 procentiusoq. FN-ip silaannaap pissusaanut immikkut ilisimasalittaasa nalunaarusiami nutaami siulittuutigaat, gassimik ipinartortalimmik aniatitsineq annerulerpat nunarsuup qaavata kissassusia 4,5 gradinik qaffasinnerulissasoq. Siulittuutigineqartoq alla tassaavoq imarsuaq qaffakkaluttuinnassasoq. Kingullertut minnerunngitsumilli silaannaq pillugu immikkut ilisimasallit oqaatigaat nunarsuup kiatsikkaluttuinnarnerata kinguneranik inuit millionilikkaat qimaasariaqalersimasut. Taamatut qimaasut 2100 nallertinnagu 200 millioninik amerlassuseqarsinnaasut oqaatigineqarpoq. - Avatangiisit patsisigalugit qimaasut nalitsinni inuit ajornartorsiutaasut annerpaatut isigineqalissanersut apeqqutaavoq, ilisimatooq Oxfordimeersoq Norman Myers oqarpoq.