Silaannaap allanngoriartornera Alaskami maluginiarneqarpoq

Silaannaap allanngoriartornera issittup nunaani imartaanilu eqquivoq, assigiimmik Inunnit misigineqarluni. Allanngoriartornerit Alaskami aamma maluginiarneqarput.

Utqiagvik-imi Alaskap avannaarpiarsuaniittumi sinerissap ilarujussua kilometerip missaani atitutigisoq, immap qaffakkiartornermigut neriorlugu nungussimavaa, ilaatigut qangarsuaq nunaqarfiusimasut maanna immap iluaniilersimallutik.

Alaskap avannaani sikusartumi ukiukkut siku isikkanik 25-nik issussuseqartarsimagaluarpoq ukiunili kingulliunerusuni meterip missaannaani issussuseqakkajunnerulersimavoq, upernaakkullu sikuiaartalersimalluni. Assersuutigalugu Alaskap kujataani Kenai-mi silaannaq isugutannerulersimavoq. Aalisakkat soorlu kapisillit, Utqiagvimmi pisarineqartalersimapput. Kujasinnerusumi uumasunik, soorlu tuttorsuarnik avannaarsuani siornagut takussaasimanngitsunik takunnittoqartalerpoq.

Sikuiuitsup sikuata annikiliartuinnarnera pissutigalugu issittup imartaata umiarsuarnit aqqutigineqalernissaa Alaskami ICC-p siulittaasuata tulliata Ronald Browerip ernumanartoqartippaa.

- Maani uumasut silaannaap allanngorneranit eqqugaareersut suli ajornerusumik eqqugaassapput, issittup imartaa umiarsuarsuit aqqutigisalerpassuk, Ronald Brower oqalugiarnermini ilaatigut oqarpoq.

Sheila Watt-Cloutier ICC-p præsidentia oqarpoq silaannaap allanngoriartornerata issittumut kingunerinik ilisimatusarneq siammarterinerlu ilisimatusarnermut tunnganerusunik maannamut imaqarnerusimasoq, allanngornerup kingunerisaanik Inuit eqqugaanerannut tunngasunik imaqarnerulertariaqartoq.

- Allanngornerup nassataanit siullernit piareersimaffiginngisatsinnillu maanna eqqugaareerpugut, taamaattumillu allanngornerup nassatassaanut tullernut maannangaaq piareersartariaqarpugut, Sheila Watt-Cloutier ataatsimeersuarnerup ulluisa aappaanni silaannaap allanngoriartornerata issittumut kinguneri pillugit oqaaseqarnermini taama kaammattuuteqarpoq.