Sila unammersuarnernik unitsitsivoq
Nunatsinni pisarnermit sila allaaneruvoq, pisartunut arlalinnut kinguneqartumik. Assersuutigalugu sikukkut golferluni unammineq Uummannami ingerlanneqartussaagaluaq aamma meeqqat alpinimik nunatsinni pissartanngorniunnissaraluat Maniitsumi ingerlanneqartussaagaluaq taamaatiinnarneqarput.
Danmarkimi silasiorfiup DMI-p nittartakkamini ullumi allaaseraa Nuummi sila februaarimi 1982-ip kingorna aatsaat taama panernartigisimasoq.
Silasiortoq John Cappelen DMI-meersoq oqarpoq ilumoortoq Nuummi 1982-imi kingullermik februaarip qaammataa taama panernartigisimasoq. Sialuk nittaalarlu taamaallaat 6,3 millimeteri nakkarsimavoq, naqitsiniisafferujussuit kujataata kitaaneersut pilersitaat.
Sinerissap kujasinnerusortaanut anngullutik siallertitsillutillu nittaalartitsisaraluartut ukiormanna februaarimi takkutinngitsoorput, John Cappelen, nunatta silaanik ukiut 20-t sinnerlugit malinnaasimasoq oqarpoq.
Silap neruminnerujussua, ukiuunerani timersuutinut qanormita sunniuteqarpa?
Aap, Uummannami sikumi golferneq unitsiinnarneqarpoq. Aaqqissueqataasoq Arne Niemann, Uummannaq Tourist Service-imit oqarpoq, ukiuni 30-ini Uummannami najugaqarnermini aatsaat taama anorlertiginera malugisimallugu.
- Imaq qangatut sikuunngilaq, taamaammat marsip 22-ianiit 27-ianut sikumi golfertitsinissaraluaq unitsiinnarparput.
Nunarsuarmit tamarmit unammiat aqqaneq-marluusussaagaluarput, siorna ajugaasoq Australiameersoq taakkununnga ilaagaluarluni.
-Ajoraluaqaaq, aappaaguli misileeqqissaagut, Arne Niemann oqarpoq.
Silasiorfimmeersoq aperaarput, ukiup silaata allaanerujussuaq ernumanannginnersoq.
John Cappelen ernumaqqusinngilaq, imaassinnaavormi silaannaap kissatsinnerata kingunerisaanik silap ukiormanna taamaannera pissuteqanngitsoq. Ilaannimi pisarnermik sila allaasarpoq, nassuiaavoq.
Sikumi golfernermik pissartanngorniunnerup saniatigut Maniitsumi meeqqat alpinimik pissartanngorniunnissaraluat aputaasannera pillugu unitsinneqarpoq.
Silap neruminnerujussua unamminissanik allanik aamma sunniivoq.
Arctic Circle Race-imut Sisimiuni marsip 23-aniit 25-anut ingerlanneqartussamut 66-iinnaat ukiormanna peqataaniarput.
- Aputeqarpianngilaq, apummi nakkartoq anorimit tingitaajuarpoq. Kisianni piareersarpugut. Unammeqataasussammi siulliit marsip 20-ani tikeraleriissapput, Arctic Circle Racemi aaqqissuisut oqarput.
Ilumut aputaasassimaqaaq. Silassamut ilimasaarutit misissuataaraanni ilimanarsinnaavoq silaannaap kissarnerulernissaa, kisianni tassa ukiumiit ukiumut nikerarsinnaasarpoq, John Cappelen DMI-meersoq oqarpoq.
Avannaata Qimussersua ukiormanna Qasigiannguani kingumut ingerlanneqassaaq. Aputaasanneralu pillugu tatsip sikuisigut aqqut atugassaq piareersarneqarpoq.
