Sila angallatigalugu nunarsuarmik kaajallaaneq
Umiarsuaq Sila ukiut marluk matuma siornagut Aasianniit aallarpoq qaammatinilu arfineq-pingasuni Danmarkimiilluni. Aappariit tamatuma kingornagut Islandip, Savalimmiut, Shetlandip qeqertaasa, Skotlandip, Europap, Afrikap, Caribiap, Amerikap naggataatigullu Canadap tungaanut ingerlaarput.
Umiarsuarmiipput umiarsuup qimmia marlunnik ukiulik Seqqugaq, qimmeq qimuttoq angalanermik sungiussingaatsiareersimasoq.
Sila aatsaat misigisassarsiorluni angalaalinngilaq. Ilaqutariit 1996-97-imi ukiumi ataatsimi Canadamik, USA-mik Caribiamillu kaajallaapput. Angallammiipput aappariit qitornaat marluk, erinarsortartoq naluneqanngilluartoq Kimmernaq aqqaluaalu.
Sila Paamiunut tallimanngormalli tikereerpoq Nuummullu ualimut tikinnissani naatsorsuutigalugu.
- Champagnemik qummoroortartunillu tikilluaqqusinissarput naatsorsuutigaarput, Kimmernaq Kjeldsen nuannaarluni oqarpoq.
Umiarsuaq pilersaarut malillugu Aasiannut angerlarluni aallassaaq, angalanerlu taamaalilluni aatsaat naammassivinneqassalluni.
