Sikunnginnera aalisakkanik tunisassiornermut iluaqutaasoq

Nunatta silaata kissatsikkiartornera nuanniitsuinnarnik nutaarsiassartaqanngilaq. Kangaatsiamimi eqqaanilu nunaqarfinni ukioq manna sikunnginnera Royal Greenlandip suliffissuini tunitsiviinilu saarullinnik tarajortikkanik qeritanillu tunisassiornermut iluaqutaavoq.
Assi © : RG
Allattoq Karsten Sommer
apriilip 18-at 2016 06:18
Nutserisoq Simon Uldum -

Suliffeqarfissuaq nittartakkamini taama allaaserisaqarpoq.

Nunaqarfinni Niaqornaarsummi Ikerasaarsummilu tunitsivinni quersuarni uninngasuutit ilanngarneqartarmata saarullinnik tarajortikkanik tunisassiorneq annertunerulersimavoq.

- Ukioq manna sikunnginnera pissutigalugu Royal Arctic Linep assartuutaata Kangaatsiami aamma nunaqarfinni Niaqornaarsummi Ikerasaarsummilu quersuarni uningasuutivut assartorsinnaasimavai. Taamalilluta ukioq manna ingerlaavartumik tunisassiorsinnaasimavugut, Kangaatsiami suliffissuup pisortaa Abia Thorsteinsen taama oqarpoq.

Ukiup qaammataani siullerni sisamani saarulliit tarajortikkat aamma saarulliit qerititat katillugit 348 tonsit tunisassiarineqarput, siorna ukiup taamaalinerani 229 tonsit tunisassiarineqartut.

- Aalisartut tunisinerat sulisuttalu aqqanillit missaasa sulinerat ukioq manna unitsinneqanngillat, Niaqornaarsummi tunitsivimmik ingerlatsisoq Judithe Wille oqarpoq.

Ikerasaarsummi aalisartut 20-t missaanniittut aamma ingerlaavartumik tunisisinnaasimapput sulisunullu 15-it missaanniittunut saarullinnik tarajorterinermik suliassaqartitsisinnaasimallutik, tunitsivimmik ingerlatsisoq Lars Karlsen nuannaarluni oqaluttuarpoq.

Royal Greenlandip tunitsiviini piffissami aggersumi nipisat suaannik tunisassiortoqassaaq, nipisaallu suaat tunisaajunnarpata saarullinnik tunisassiorneq aallartinneqarumaarpoq.