Sikunik alapernaarsuut nutaaq misiligarpaat

Canadami angallannermik isumannaallisaaniarluni, umiarsuit uuliamillu qillerivissuit iluliarsuarnit aporneqannginnissaannik suliniuteqartoqalersoq, Montreal Gazette allappoq.

Professor Stuart Savage McGill University-mi Montrealimi, isumannaallisaanermut atugassanik qarasaasiakkut alapernaarsuutinik suliaqarpoq.

Stuart Savage-p qarasaasiani, Newfoundlandip Kalaallit Nunaatalu imartaani anorip sarfallu sammiviinik, sakkortussusiinik aamma immap kissassusaanik nalunaarsuilluni ilulissat sikorsuilluunniit sumut ingerlaarnerat paasisinnaalersimavaa, tamannalu alapernaarsuutinit ullumikkut atorneqartunut naleqqiullugu 30 procentimik pitsanngoriarnerunerarlugu.

Allaaserisami assersuutigineqarpoq Titanic 1912-imi issimasut 1.500-t ajunaarnerannik kinguneqartumik umiummalli, alapernaarsuinerit pitsanngoriangaarsimannginnerat.

Canadami sikunik alapernaarsuisartut qarasaasiami programmit nutaat misileraleruttorpaat, naatsorsuutigineqarporlu piffissap sivisunngitsup iluani nunani allani, pingaartumik umiarsuarnik uuliasiornernillu ingerlatsisut, aamma iluaqutigilerumaaraat.