Sikumi ilinniartut angallammik angalaarlutik ilinniagaqarput
Students on Ice imaluunniit sikumi ilinniartut tassaavoq Canadami ilinniartitaanikkut suliniut nutaakanneq 1999-imiilli ingerlanneqartoq. Siunertarineqarpoq ilinniartut naggueqatigiinnit Inunneersut taakkunanngaanneersuunngitsullu soorlu ilisimatuut immikkullu ilisimasallit allat nunani issittuni sap. akunnerini marlunni immakkut angalaartarnissaat. Angalanermi naammasseqqammersumi ilinniartut 60-it, taakkunannga Inuit 20-t ilisimatuullu 45-t peqataapput.
1999-imiilli katillugit ilinniartut 1200-t taamatut angalanermi peqataasarsimapput.
Taakkua, tassaanerusut universitetimi ilinniartut, angalaqatigiinnerminni pinngortitami pissuseqatigiinnermiit kulturimullu sunik tamanik ilinniartinneqartarput, kisiannili nunat issittut alapernaarsornissaat misigisaqarfiginissaallu annertunerusumik ilinniartarlugu. Ilinniartut
tamatumunnga peqatigitillugu nunat issittut najugaqarfigisatik qimerloornissaat, aammattaarli isinik nutaanik takunissaat ilinniarsinnaavaat.
Ukioq manna ilisimatuut eqqaassanngikkaanni aammattaaq eqqumiitsuliortut marluk nipilersortartorlu ataaseq peqataapput, taamaalillutillu ilinniartut qalipaasinnaallutik, erinarsorsinnaallutik imaluunniit piumagunik nunat issittut pillugit pinnguarsinnaallutik.
Students on Ice pillugu pilersaarummi oqaatigineqartutut ilinniartut nunani issittuni pinngortitap ilinniarnissaa namminerlu misigisaqarfiginissaa pineqarpoq. Neriuutigineqarpoq taakkua siunissami nunanit issittunit patajaatsunik pitsaasunillu misilittagaqarlutik ilisimatuunngorumaartut.
