Sikuiuitsup sikua aatsaat taama millitigaaq
Tassami ukiormanna iluarinanngitsumik rekordiliisoqartussanngortoq, CBC North nittartakkamini allaaserisaqarpoq.
Canadap avannaani illoqarfimmi Tuttuujaartuumi innuttaasut Issittup imartaanut sammisumiittut immap sikuata milliartornera qanimut malinnaaffigisinnaavaat.
- Qalasersuup sikuata killinga siornatigut Tuttuujaartuumit 60 aamma 70 kilomerit missaannik ungasissuseqartaraluarpoq, taama oqaluttuarpoq 89-inik ukiulik Eddie Gruben, oqaatigalugulu maanna sikup killinga 120 aamma 130 kilometerinik ungasissuseqalersoq.
USA-p aputip sikullu annertussusianik nalunaarsuisarfianit oqaatigineqarpoq, siku Danmarkip annertussusaata pingasoriaataatut angitigingajattoq ullormut aattartoq!
Ukiormanna juulip naalernerani Tuttuujaartuumi 30 gradit angullugit kiattarpoq:
- Kiattorujussuuvoq. Imaq ima kissartigaaq allaat meeqqat immami nalunnguarsinnaallutik, Eddie Gruben CBC Northimut oqarpoq.
