Sikuiuitsumi kujallermiut nipilersoqatigiituaat Nunatak

Aqagu ulloq julip arfineq aappaat 2007, naalisarlugu 070707 assigiinngitsunik pisoqaaluffiussaaq, soorlu siorna 060606 aamma alutorineqarluni pisoqarfiusimasoq.

Aqagu katittussarpassuaqarpoq aammali pisussat allat saniatigut nunarsuarmi nipilersortartut erinarsortartullu tusaamasarsuit soorlu Madonna, Snoop Dog, Metallica allallu nunarsuarmi illoqarfissuarni assigiinngitsuni, New Yorkimi, Londonimi, Sydneymi, Rio De Janeiromi, Shanghaimi Hamburgimilu tusarnaartitsissapput, tusarnaartitsinersuillu silaannap kissakkiartuinnarneranut tunngatinneqartut ataatsimut atserneqarsimapput Live Earth.

Tusarnaartitseqataassapput sikuiuitsumi kujallermi immaqa kisiartaallutik nipilersortartut immnnut atsersimasut Nunataq.

Nunataq isumaqarpoq sermersuarmi nuna nuisasoq, sikuiuitsoq kujalermilu nipilersoqatigiit imminnut nunatamik atsersimasut ilisimatuunik, ingenørimik, imaani umaasulerituumik silasiortumik issittumilu ilisimasortamik inuttaqarput.

Nunatakkut sikuiuitsumi kujalermi ilisimatusarfimminni erinnanik marlunnik immiussaat TV-kkut internetikkullu siammarterneqassapput, tusarnaartitsivissuarnilu TV-rujussuartigut aamma aallakaatinneqarnissaat naatsorsuutigineqartoq DR-p nittartagaani allaaserineqarpoq.