Sikuitsumi kujallermi sermimut qilleripput
Nunarsuarmi silap pissusaa ukiuni kingullerni 800.000-ini qanoq issimava, apeqqut taanna ilaatigut akissutissarsiniarlugu paasiniarlugulu sikuitsumi kujallermi sermimut qillerisoqarpoq, qillerut kilometerinik pingasunik takitigisoq qilllerisinneqarpoq. Silap pissusaata allangoriapiloortarsimanera paasineqarpoq, ukiut qulikkaat ingerlanerinnaani kiatsipiloortarsimavoq issilertarsimalluniluunniit.
Allattoq Louise M. Kleemann
maajip 15-at 2008 09:07
Taamatut oqaluttuarpoq, København-imi Niels Bohr Institut-imi siku avatangiisillu pillugit ilisimatusarfimmeersoq Thomas Blunier, sikuitsoq kujallermi qilllerilluni misissukkanik misissuereerluni.
Nunarsuup arfineq pingasoriarluni issinnerpaaffiata issineruleruneratalu nalaani avatangiisit pissusulersornerat malinnaaffigisinnaavarput, tassanilu takuneqarsinnaavoq silaannaap CO2-mik akoqarneratigut silap kiassusianut sunniutai. Silaannaq CO2 akoqarluarpat sila kiannerulissaaq.
Sikuiutsumi kujallermi sikumi qillerilluni misissuinermi paasisat silap pissusaannik ilisimatuut nunarsuarmi silap pissusaata siunissami qanoq ikkumaarneranik siulittuisinnaanerannut iluaqutaassapput.
