Sermeq Qalasersuup nalaaniittoq Storbritanniap angeqataanik putoqalersimasoq, qaammataasakkut assilisat kingulliit paasinarsisippaat.
Assilisat aggustip ulluisa 23-anniit 25-iata tungaanut assilisaapput, avataarsualiartarnermut Europami suliniaqatigiiffik, ESA, assiliiartornissamik isumaginnittuulluni. Sikumi putu Svalbardip avannaatungaaniit Sikuiuitsup kujataa aqqusaarlugu Ruslandip qanittuanut, Qalasersuarmut killeqarpoq.
Sermip aasakkut aakkiartortarnera nalinginnaavoq, ESA-li naapertorlugu Qalasersuup tungaanut aatsaavissuaq taama malussartoqarpoq. Avataarsualiartarnermut suliniaqatigiiffimmi ilisimatusartut tamanna ernumanartoqartippaat.
- Sikut eqimaneranni umiarsuit immaqa tamaanaqqussinnaasarsimassagaluarput, tassa Qalasersuarmut, sikulli eqimavallaannginneranni aatsaat taama misigisaqarpugut. ESA-meersoq Mark Drinkwater oqarpoq.
Sikuiuitsumi sikup ukiariartornerani milligaluttuinnarnera qaammataasakkut assilisani ukiuni kingullerni 25-ni malunnarsigaluttuinnarpoq.
- Pissutsit taamaaginnassappata Europap Asiallu akornanni aqqut, tassa Beringip Kangerliumarnga aqqusaarlugu uiartariaq, piffissami sivisuumi sikunavianngilaq, Sikuiuitsorlu aqqusaarlugu Nunarsuarmik ukiut qulit 20-lluunniit qaangiuppata kaajallaasinnaanngussanersugut paasiniassavarput, Mark Drinkwater oqarpoq.