Siku Extreme Arctic Challenge ippassaq aallartippoq
Avatangiisit kusanarluinnartut timersorerillu assoroornarluinnartut, tamakkuupput inuit 68-it nunanit assigiinngitsunit 14-ineersut ulluni makkunani Tasiilap eqqaani misigisinnaasaat.
Siku Extreme Arctic Challenge-mik taallugu ukiut arfineq-aappassaanik ingerlanneqartumi Tasiilami aaqqissueqataasoq, Anders Stenbakken, unamminerup aallartinnera ippassaq aallartittoq pillugu ima oqarpoq.
- Unammersuarnerup aallartinnera iluatsitsiffigeqaarput, aammami silaginneranik iluatsitsigatta. Aallaqqaammut helikopteri atorlugu fiilimiliortoqartussaagaluarami, tassa kisianni putsermat, aarsaartartumik fiilmiliortulerluta, unammineq aallartipparput. Polhelmsfjeldi-li tassa Qimmeertaajaliip Qaaqqartiva 1000 miiterisut portutigisoq tikinneqarmat putserunnaarpoq, sunalu tamarmi erseqqarissilluni. Taamaammat peqataasut unammiffigisap kusanassusaa tupigusuutigeqaat. Anders Stenbakken oqaluttuarpoq nangillunilu: - Danmarksstrædip sikorsuillu aammalu sermersuup tungaanut isikkiveqarput, unamminerullu aallartinnera kusanarluinnarpoq. Unammeqataasut unammiffigisaq kusageqaat, aammalu unamminerup aaqissuunneqarnera nersualaaqalugu. Unammineq assoroornartutut unamminartutullu unammeqataasunit nalilerneqarpoq.
Ippassaq unamminerup aallartinnerani nunatsinniit peqataasut kalaaliinnavinnik peqataasullit, Team Maniitsoq 225-imik taaguutillit apuuteqqaarput. Ullumilu unamminerup aallartinnerani mountainbike-inik 35 kilomiiterinik ungasitsigisumut sikkilerluni unammineq aallartinneqarpoq, Anders Stenbakken-ilu oqarpoq, sikkilereernerup kingorna qaqqat assigiinngitsut pingasut majuarfigineqassasut, taakkualu katillugit 25 kilomiiterinik ungasissuseqarput. Unamminerup immikkoortuata aappaa unnugu arfineq-pigasut missaani naammassineqassaaq, maannamullu Team Maniitsoq ingerlalluartoq, Anders Stenbakken naggasiilluni taama oqarpoq.
Taama oqarpoq Anders Stenbakken Siku Extreme Arctic Challenge-imik aaqqissueqataasoq.
Peqataasut 68-it saniatigut tusagassiortut nuanit allaneersut tallimat malinnaapput, ilaatigut New York Times-imi tusagassiortut malinnaapput.
