Sikorsuarnut kiggigutsikkaluartut kaanngarput
Aalisariutit marluk piginneqatigiiffimmit Arctic Prime Fisheries-imit pigineqartut Nunap Isuani Ikerasakkuakkoorniartillutik sikorsuarnit kiggigussaallutik ippassarli ajornartorsiortinneqalerput.
-Maannali tassa angallatit Prime Bibi aamma Prime Edith immikkut tamarmik sisamanik inuttaqartut unnuaq naallugu malittarisatik Kangilinnguani sakkutooqarfimmeersup (Grønlands Kommando) Søren Dreijerip uloriartorsiorunnaarnerarpai, siunnerfimminnullu Nanortalimmut Qaqortumullu ingerlaarnerarlugit.
Ukioq taamaaligaangat nalinginnaavoq kujataani sikorsuit ajornartorsiutaasarnerat. Taamaammat Kangilinnguani Sakkutooqarfimmiit eqqumiigineqarpoq, sooq aalisariutit Ikerasassuakkoortinniarneqarsimanersut.
- Silasiorfiup DMI-p sikusiornermik immikkoortortaqarfiata sikorsuit taqqavani qanoq eqimatiginerat ilisimatitsissutigiuarpaa, silallu anorsarissinissaa ilimasaarutigereerlugu. Assut paasiuminaatsipparput, aqqut ulorianarneq ullormiit ullormut allanngorartuartoq sooq atorniarsimaneraat, Søren Dreijer oqarpoq.
Inuttat annanniutilersoreerlutik angallatit qimannisaattsinissartik piareersalereersimagaluarpaat, pisullu nalaani sakkutuut umiarsuaat HVIDBJØRNEN qulimiguulialu sikorsuit kujataatungaanni sillimatinneqartuarsimavoq.
-Aalisariutit naalagai akisussaassuseqarunik Ikerasassuakkoortariaqarsimanngikkaluarput, paasissutissammi tamarmik imaaliallaannaq uagutsinnit silasiorfimmiilluunniit pissarsiarineqarsinnaapput, Sakkutooqarfik nangippoq.
Aalisariutit pineqartut Savalimmiuniit nunatsinnut aalisariartillutik, Ikerasassuakkoornerminni, malissuarnit sikorsuarnillu unnuaq kiggigussaagaluartut tassa maanna ingerlaqqittut, Arctic Prime Fisheriesip piginnittua Hannes Hansen ilisimatitsivoq.
Soormitaavamiuna angallatit Prime Bibi Prime Edithilu ulorianarnikkooriaraluarsimasut?
- Silaginnerussasoralugu, kisianni anori tassanngaannaq takkussimavoq, piginneqataasoq radioavisimut nassuiaavoq.
- Inuttat soorunami qasoqqapput, maannali angallatit Ikerasassuarmit pulammaaffimmikkut anillariarlutik, Nunap isua uiarlugu Nanortallip Qaqortullu tungaanut ingerlaarput. Iluatsitsinissaallu naatsorsuutigaarput, Hannes Hansen oqarpoq.
Arctic Prime Fisheriesip aalisariutaatai Savalimmiunit nunatsinnut ingerlaaqatigiittut pingasuusimagaluarput, marluk Ikerasassuakkoortut ataaseq Nunap Isuatigut uiartoq Qaqortumut apuutereerpoq.
