Sikkilertartoq Ricky sikkilillaqqissorsuarnut nuuppoq
Team Concordia Forsikring Danmarkimi inuussutissarsiutigalugu sikkilertartut sakkortunersaraat.
- Kalaaliuvunga issilu iluareqaara, Ricky Enø Jørgensen inuussutissarsiutigalugu sikkilertartunut allanut nuunnini pillugu apersorneqarnermini qungujulalluni oqarpoq.
Sikkilersinnaanermik piginnaanilik kalaallimik anaanaqarpoq danskimillu ataataqarluni. Ilulissani inunngorpoq, qulinilli ukioqarluni angajoqqaani Silkeborgimut nuummata nooqatigai, sulilu tassani najugaqarluni.
Ricky Enø Jørgensen inuusuttuaraallunili Danmarkimi sikkilertartunut nunanut allanut unammisartunut peqataasalerpoq. Nunat akornanni nunanut allanut unammisartut unammisaqattaartarnerpassuini peqataasarsimavoq. Inuusuttuaraalluni sikkilerluni ulluni arlalinni unamminermi Trofeo Karlsberg-imi ingerlaarfimmi ataatsimi ajugaavoq.
2009-mi Ricky Enø Jørgensen Danmarkimi sikkilertartunut nunanut allanut unammisartunut U23-nut A-nut nuuppoq Frankrigimilu ulluni arlalinni sukkaniunnermi Tour de l’Avenir-imi sakkortuumi peqataanermi kingorna Schweizimi nunarsuaq tamakkerlugu pissartanngorniunnissanut peqataasussanngortinneqarluni.
Ricky Enø Jørgensen 2011-mi Danmarkimi sikkilertartunut nunanut allanut unammisartuni U23-ni A-ni peqataaqqissaaq.
Ricky Enø Jørgensenip 2011-mi inuussutissarsiutigalugu sikkilertartuni Concordia-mi sikkilertartoqatigiit ajugaasarnissanut amerlasuunut, nammineq aamma sikkilertartuni A-ni – tassunga ilanngullugu U23-t Danmarkimi pissartanngorniunneranni ajugaanissani – ikiuuttarnissani suliassarai, aammalu Københavnimi nunaannaap aqquserngisigut sikkilerluni nunarsuaq tamakkerlugu pissartanngorniunnermi ajugaaqqinnissani suliassaraa.
- Team Concordia-mi inuit tunuliaqutaasut toqqissimanaraakka aamma inuussutissarsiutigalugu sikkilertartoqatigiinnut sakkortuunut ingerlariaqqinnissannut ikiorsinnaagaannga isumaqarpunga. Team Concordia-mi sikkilertartut allat akornanni ajunngilluinnartumik inuuvunga tamannalu sutigut tamatigut uannut pingaaruteqartorujussuuvoq, Ricky Enø Jørgensen Team Concordia Forsikring Himmerland-imi tusagassiisartuni pisortamut oqarpoq.
