SIK: Sulisitsisut annertuumik peqquserluttuliorput
Jess G. Berthelsen isumaqarpoq sakkut atorneqarsinnaasut tamaasa atorlugit Nunatta karsiata pisariaqanngitsumik annaasaqannginnissaa peqquserluttuliortoqannginnissaalu anguniarlugu akiliisitsiniartarnermi oqartussaasut piaarnerpaamik sulisitsisunut aamma iliuuseqartariaqartut.
- Aningaasaqarnermut Naalakkersuisoq, Per Berthelsen, SIK-mit sakkortunerpaamik inakkusussavarput kikkut tamat inatsit malillugu assigiissumik pineqartarnissaat qulakkeerniaqqullugu, assigiinngisitsisoqassanngilarmi.
Sulisitsisut amerlavallaarujussuit akileraarutinut A-skatinut akiliutinik unerartitanik ingerlatitseqqinnatik tigumminniinnartarnerat paasinarsimmat akileraarusiisarneq qitiusumik aqunneqalissasoq Inatsisartunit aalajangiunneqarpoq, tamannalu SIK-p aamma tapersersorsimavaa.
Qitiusumik aqutsilerneq kissaatigineqartutut sunniuteqarsimanngilaq, taamaammallu akisussaallutik oqartussaasut ingerlaannartumik iliuuseqarnissaat SIK-p kissaatigaa, akileraarutit A-skatit sulisitsisut namminneq kaasarfiinut nakkaannartaqqunagit, SIK-p siulittaasua, Jess G. Berthelsen, oqarpoq.