SIK suli ilungersuuteqarusuppoq
Nunatsinni suliffeqarfissuit annersaasa ilaat, Royal Greenland A/S Nunatsinni Sulisitsisut Peqatigiiffiannit ilaasortaajunnaareernermi kingornagut kiisami SIK-mut toqqaannartumik namminersorluni juullilersoq isumaqatigiissuteqartoq, Sulinermik Inuussutissarsiuteqartut Kattuffiat ukiortaami pilluaqqussuteqarnermini allappoq nangillunilu:
Pisoq ilaasortarpassuatsinnut pitsanngoriaatinik kinguneqassaaq, tassami aningaasarsiat januaarip aallaqqaataanit qaffaavigineqartussanngorput kiisalu aningaasaateqarfinnut akilersuineq aamma aallartinneqaqqissalluni. Angusarineqartoq SIK-mit isigalugu pingaarutilerujussuartut oqaatigineqartariaqarpoq, allaallumi ilaasortarpassuatsinnut ajugaanertut suaarutigineqartariaqarluni.
SIK-p siulittaasua nalunaarummini allappoq nangillunilu:
Nunatsinni sulinermik inuussutissarsiuteqartut akissarsiatigut, inuuniarnermi atugarisatigut, ilinniarfissaqartitaanikkut, suliffissaqarniarnikkut suliffimmilu toqqissisimanartumik oqartussaaqataallutillu pitsaasunik atugassaqartitaanissaat SIK-p anguniagaanni pingaarnerpaajuarput. Ukiumi qaangiuttumi oqaatigeriikkattut SIK-mi angusavut ajoriinnagassaanngeqaat, suliassaqarpugulli suli. Ajoraluartumimmi ukioq naalivissoq Inatsisartuni partiit amerlanerusuteqartut tassanngaannaq aningaasat pisissutigineqarsinnaanerat apparsarpaat akitsuutit assigiinngitsut qaffannerisigut. Tamanna ilaasortarpassuatsinnut annermik eqquivoq, tassanilu iluarsiniagassaqarpugut. Taamaattumik ukiumi aggersumi ilaatigut SIK-p Atuisartut Siunnersuisoqatigiivini suleqataanermini allatigullu sakkortusisamik aningaasat pisissutigineqarsinnaanerisa qaffaqqinnissaat ilungersuutigeqqissavarput. Tamanna aamma suliffeqarfinnik allanik suli SIK-mit isumaqatigiissusiorfigineqarsimanngitsunut sammitinneqassaaq, eqqaamajuartussaavarpummi Nunatta sulisartut atorfissaqartittuassammagit naalakkersuinikkut aningaasarsiornikkullu Nunarput kiffaanngissuseqalerumaartussaq aamma pilersinniarutsigu.
Sulinermik Inuussutissarsiuteqartut Kattuffiat ukiortaami pilluaqqussummini ilaatigut taama allappoq.
