SIK-p Royal Greenland avoqqaaraa
- Taamaattumik isumaqarpunga Royal Greenlandip imminut ima aperinissaanut piffissanngortoq: Sooruna suliffeqarfiutitsinni taamatut sulisussanik ajornartorsiuteqartuartugut, Jess G. Berthelsen oqarpoq. Taassuma akissarsiaqartitsineq tikkuarpaa. Tassami sulisut nalunaaquttap akunnerini arfineq'pingasuni akissarsisinnaajumallutik nalunaaquttap akunnerini qulingiluani sulisariaqartarnertik naammaginngilluinnarpaat, suliffeqarfiummi sulisut qiteqqukkaangata ulloqeqqaraangatalu akissarsiaannit ilanngaattarpai. Tamanna aaqqiiviginiarlugu SIK isumaqatigiinniartarnerni Royal Greenlandimut piumasaqaateqartaraluarpoq.
- Tamatuma peqatigisaanik sulisut suliassaarunnerat pissutigalugu, piffissakkut piffissaanngitsukkullu angerlartitaajuartarput. Aamma qaqugu suliartoqqissinnaanerlutik nalusarpaat. Suliffeqarfik taamaattoq pilerinartuunngilaq, SIK-p siulittaasua oqarpoq, aamma taassuma Royal Greenland ajornartorsiuteqaleraangat, sulisut pisuutitaajuartarnerat qatsulluinnarpaa.
Jess G. Berthelsen taama nalunaaruteqarpoq, Royal Greenlandip sapaatip akunnerani kingullermi aalisakkanik suliffissuarni Uummannami, Qasigiannguani Paamiunilu sulisunik 85-inik amigaateqarluni nalunaareersorlu - naak illoqarfinni taakkunani pingasuni suliffissaaleqisoqaraluaqisoq.
- Ineriartortitsinissamulli akornutaanerpaaq tassaavoq, illoqarfinni sulisussanik atorfinitsitsisoqaraluaraangat sulinerminnik naammaginartumik nakkutiginnissinnaasannginnerat, Royal Greenland tusagassiuutinut nalunaarummini allappoq.
Tamatumunnga peqatigitillugu nalunaarummi oqaatigineqarpoq, Royal Greenlandip sulisussaaruttarnini qaangerniarlugu ataavartumik aaqqeerusuttoq, aalajaatsumik tunisassiorsinnaaneq qulakkeerneqarniassammat. Taamaattumik Nunatta avataaniit sulisussarsiortarnissaq pisariaqalersinnaasoq oqaatigineqarluni, tamannalu SIK-p akueriumanngilluinnarpaa.
