SIK-p aaqqissuuteqqinneqarnissaa kinguartippaat
Allaffeqarnikkut qitiusumik ingerlatsilernissaq, taamaalilluni soorlu ilaasortaanermut akiliutip angissusissaata immikkoortortaqarfinnit aalajangerneqartarunnaarnissaa siunnersuutaavoq, tamannali akuersaarneqanngilaq.
- Allanngortitsiniarnermi siunertaavoq, immikkoortortaqarfiit sulisartoqarnermut tunngasunik aallussinerunissaat, allaffissornikkullu suliakkersorneqannginnissaat. Ataatsimeersuarnermi amerlanerussuteqaqqalaarluni tamanna akuersissutigineqarsinnaagaluartoq, SIK-p avissaartuutinnginnissaa anguniarlugu siunnersuut tunuartikkallarpara, siulittaasutut qinigaaqqittoq Jess G. Berthelsen oqarpoq.
- Aaqqissuusseqqinnerup kinguneranik immikkoortortaqarfiit sunniutaarunnissaminnik ernummateqarnerat paasisinnaalluarpara. Ullumikkummi illusinissamut aningaasaleerusunnerlutik nammineerlutik aalajangiiffigisinnaavaat, ilaasortaanermullu akiliut tamatumunnga naleqqussarsinnaallugu. Nutaamik aaqqissuusseqqinnissaq, kingusinnerusukkut ataatsimeersuartoqalerpat uterfigeqqissavarput, aalajangiisoqartinnaguli annerusumik paasissutissiissutiginissaa oqallisiginissaalu pisariaqartinneqarput, Jess G. Berthelsen oqarpoq.