SIK-p aaqqissuusaanera allannngortinniarneqarpoq

SIK apriilip ulluisa aallaqqaataanni, aappaanni pingajuannilu Qaqortumi ataatsimeersualerpoq. Kattuffiup nutaamik aaqqissuuteqqineqarnissaa oqaluuserineqartussanut ilaavoq. Allaffissornermi suliassat massakkut immikkoortortaqarfinni suliarineqartartut kattuffimmi suliarineqartalernerisigut kattuffik nukittunerulersinnaassasoq siulittaasoq, Jess G. Berthelsen, oqarpoq.

-Assersuutigalugu immikkoortortaqarfik 200-nik ilaasortaqarpat allaffimmioqassanersoq, imaluunniit siulittaasoq allaffimmiutut aamma sulissanersoq ilaasortat aalajangissavaat, Jess.G. Berthelsen oqarpoq.

Sulinermik inuussutissarsiuteqartut kattuffianut ilaasortat qaammatit tamaasa aalaakkaasumik akiliisartut massakkut 6000-it missigivaat. Ilaasortat qaammammut akiliutigisartagaat immikkoortortaqarfimmiit immikkoortortaqarfimmut massakkut aamma assigiinngillat. Assigiilernissaat aamma isummerfigineqartussaavoq.

Assersuutigalugu Qaqortumi ilaasortat katillugit 255 koruunit akiliutigisarpaat, taakkunannga 155 koruunit immikkoortortaqarfimmut, 100 koruunillu kattuffimmut ingerlateqqinneqartarput. Aasianni ilaasortat katillugit 260 koruunit qaammammut akiliutigisarpaat.

SIK-p immikkoortortaqarfii anginerit sisamat, tassaasut Aasiaat, Sisimiut, Nuuk Qaqortorlu massakkut allaffimmioqarput.