Jess G. Berthelsen, ukiorpassuarni Sulinermik Inuussutissarsiuteqartut Kattuffianni siulittaasuusoq, Siumut tunuliaqutaralugu Inatsisartunut qinigassanngortippoq.

Peqqinnissaqarfimmut, atuarfeqarnermut isumaginninnermullu tunngasut pitsanngorsaaviginissai Jess G. Berthelsenip qineqqusaarutigerusuppai. Pitsanngorsaanissarli piviusunngussappat nunatta aningaasanik isaatitsinerunissaa avaqqunneqarsinnaanngitsoq taassuma nassuerutigaa.

- Neriorsuutissanik ulikkaaraluarpunga. Kisianni Aningaasanut Inatsit 2025-moortoq qimerloorakku takusinnaavara aningaasaateqanngitsugut, Jess G. Berthelsen, KNR-ip SIK-p allaffianut pulaarmagu taama oqarpoq.

Taamaammat Jess G. Berthelsenip nunatsinni aatsitassarsiornikkut aningaasanik isaatitsinerunissaq pisariaqarsoraa; uanilu Narsami Kuannersuit avaqqunneqarsinnaanngitsoq oqaatigalugu.

- Ataasiaannarnanga oqaatigisarpara; Kuannersuit ammarneqartariaqarpoq. Kisianni soorunami pingaartippara inooqataasut peqataatinnissaat. Allaat immaqa nuna tamakkerlugu taasisoqartariaqarpoq, Jess G. Berthelsen oqarpoq, nangillunilu;

- Eqqaamassavarput; aatsitassaatigut Nunarsuarmi pisariaqartinneqarput, nunarsuarmioqatittalu atorfissaqartitaanik pilersueqataasariaqarpugut.

Jess G. Berthelsenip aatsitassarsiornerup pinngortitamik mingutsitsisinnaanera nassuerutigaa; mingutsitsinerullu sapinngisamik minnerpaaffianiitsinneqarsinnaanera oqaatigalugu.

Apeqqut Kuannersuarnut tunngasoq Inatsisartunut qinersinerup siuliani aalajangiisooqataanikuuvoq. Tassani Inuit Ataqatigiit Kuannersuarni aatsitassarsiornissamik akerliunermikkut qinersisartunit taperserneqangaatsiarput; pingaartumik nunatta kujataani. Akerlianik Siumut Kuannersuarnut tunngasumi avissaartuummata Kommune Kujallermi kinguariarpoq.