SIK: Ilanngaassivik suli akueriuminaappoq
![Jess G. Berthelsen](/sites/default/files/styles/image_934x467/public/article_images/jess_g2.jpg?itok=-H2gI8qG)
Naalakkersuisut Ilanngaassivik pillugu tusarniuteqaqqinneranni SIK-p siulittaasuata isumaa allannguuteqarpallaanngilaq.
Taassuma 2017-imi tusarniaanermi akissutini suli attappaa, tassa aningaasat atorneqarsinnaasut annikippallaarnerarlugit.
Aningaasallu atorneqarsinnaasut amerlanerusariaqarneri oqariartuutigalugu.
- Isumaqarpunga minnerpaaffissamik inissiinissaq suli qaffasinnerusariaqartoq, allaat kisimiittunut 7000 koruuninut aappariinnullu 10.000 koruuninut inissiisoqartariaqartoq, ullumikkut nerisassat taama akisutigisut, SIK-p siulittaasua Jess G. Berthelsen KNR-imut oqarpoq.
AAMMA ATUARUK Kia qaammammut 3.000 koruunit inuussutigisinnaavai?
Naalakkersuisut inatsisissatut siunnersuummi aningaasat atoriaannaat kisimiittumut 4000 koruuniutikkusuppaat aappariinnut 6000 koruunit, meerartalinnullu qaffasinnerulaartillugit.
Taakkuli SIK-mit naammagisimaarneqanngillat.
- Uuliamut qaffaasoqarpoq, kallerup inneranut aamma qaffaasoqarniarpoq. Mikivallaalereerpulluunniit, taamaattumik isumaqarpunga suli annertunerusumik minnerpaaffissamik inissiisoqartariaqartoq, Jess G. Berthelsen oqarpoq.
Naalakkersuisut aningaasat atoriaannaat kisimiittumut 3000 koruuniunissaat siornaak tusarniaanermi siullermi siunertarinikuugaluarpaat, tamannali Jess G. Berthelsenimit isornartorsiorneqarnikuuvoq, apeqquserneqarlunilu kiap ullormut 100 koruunit inuussutigisinnaanerai.
Pingaarnersiuisariaqartartut
SIK-p ilaasortani akiliinngitsoortartut paasisinnaanerarpai, pingaarnersiuisarnerarlugillu.
- Ilaasortagut piaaralutik akiliinngitsoorneq ajorput, toqqagassaqarunik akiligassat akilerlugit imaluunniit meeqqatik nerisassaqartittariaqarlugit taava tupinnanngitsumik meeqqanut aningaasat taakkua atortariaqarlugit aalajangertarput, Jess G. Berthelsen oqarpoq.
Taassuma piumasatik, tassa kisimiittumut 7000 koruunit aappariinnullu 10.000 koruunit, anguneqassappata Ilanngaassivik ajoriffissaqartinngilaa.
- Qaffassappat uagut inooqataaffigisinnaavarput, Jess G. Berthelsen oqarpoq.
Innuttaasut pisortanut akiitsullit 60 procentii 100.000 koruunit ataallugit ukiumut akissarsiaqarput.