SIK GA-lu suli avissaaqqapput

Kalaallit Nunanni Sulisitsisut Peqatigiiffiata (GA-p) SIK-llu ualimut ataatsimiinnerat minutsit quliunngitsulluunniit ingerlareerluni unippoq.

Kattuffiit taakku marluk marsip 13-anniilli aningaasarsiat pillugit isumaqatigiinnialerput, suli iluatsinngitsumik. Maanna naapinneq siullertulli angusaqarfiunngilaq.

Aaqqiagiinngissutaasoq tassaavoq, GA SIK-p Qaammarsaanermut Ilinniartitaanermullu Aningaasaateqarfianut akiliisarumanngimmat. GA-p aalajangiusimavaa, aningaasat sulisartut aningaasarsiaannut tuttariaqartut.

SIK-mit siunnersuutigineqaraluarpoq, Danmarkimi sulisartut kattuffiattulli aaqqiisoqassasoq, taamaalillutik sulisitsisut pikkorissartitsisarnermut aningaasaliissutinik pissarsisinnaalissallutik. Kisianni tamanna GA-mit isumaqatigineqanngilaq.

Sulinermik inuussutissarsiuteqartut 6000-it missaanniitut suli utaqqisariaqassapput. Illuatungeriit isumaqatigiikkunnarpata, aningaasarsiat apriilip aallaqqaataaniit utimut iluarsineqartussaammata.