SIK: Arctic Umiaq Line Naalakkersuisut ikiortariaqarpaat
Timmisartumik umiarsuarmilluunniit nunatsinni angalassagaanni akisungaarmat SIK-mi ilaasortaannaanngitsut aammalu inuit amerlasuut angalanissaminnut akissaqarneq ajorput.
- Isumaqarpugut pingaaruteqartoq maani inuiaqatigiit kalaallit aammalu ilaasortagut illoqarfimmiit illoqarfimmut aamma nunaqarfimmiit nunaqarfimmut nikissinnaasariaqartoq, illoqarfimminut nunaqarfimminnullu qilersugaanatik. Massakkummi angalaniarnermut akit ima qaffasitsigaat ilaasortarpassuagut periarfissaqaratik ilaquttaminnut imaluunnit allamut nikinnissaminnut. Allatut ajornartumik namminersorlutik oqartussat massakkut taamatut inissisimatilluta angallanniarnermut tapiissuteqartariaqartut, taamaalillutik ilaasortagut akilersinnaasaminnik aamma sinerissami ilaquttaminnut allanullu angalasinnaalerniassammata, Jess G. Berthelsen oqarpoq.
SIK-p siulittaasua isumaqarpoq Naalakkersuisut aningaasaliinissaminnut piareersimanngikkunik, Arctic Umiaq Linep pisiareqqinnissaa periarfissatut isigisariaqaraat.
Naalakkersuisuusimasut Siumut siuttoralugu Arctic Umiaq Line 2005-mi namminersortunngorsassallugu aalajangerpaat. Naalakkersuisut angallannermut pilersaarut nutaaq ukioq taanna saqqummiuppaat, tassanilu erserpoq umiarsuakkut angallassinermiit timmisartuussineq qulimiguulinnillu angallassineq salliutinniaraat.
Maannali illuatungiuliuttunngorsimasuni Siumumi isuma allanngorpoq.
- Naalakkersuisut suliassaq una pingaartillugu qaqittariaqarpaat, aamma inuiaqatigiinni toqqissisimannginnissamik pilersitsinnginnissamik pingaaruteqartorujussuuvoq, uanilu isumaqarpugut suliffeqarfissuit taakua piginnittuisa tassalu naalakkersuisut peqataallutik pingaartillugulu suliareqqinniartariaqarpaat inuiaqatigiinni toqqissisimasumik aamma ajornerusumik atugaqalinginnissaat angutserlugu, Siumup siulittaasua Aleqa Hammond naggasiivoq.
Arctic Umiaq Line Air Greenlandimit Royal Arctic Linemillu pigineqarpoq. Ippassarli saqqummerpoq Air Greenland Arctic Umiaq Linemut piginneqataajumajunnaartoq, umiarsuaatileqatigiiffiullu ingerlaannarnissani qularigaa.
