SIK akissarsiat pillugit Royal Greenlandimik isumaqatigiissutaa pitsaanerpaaq
Isumaqatigiissut nutaaq aappaagu januaarip aallaqqaataaniit atuutilissaaq, 2013-illu naanissaanut atuuttussaalluni.
Sulisut akissarsiaat 11,48 procentinik qaffaavigineqarnissaat isumaqatigiissutigineqarpoq, akissarsiallu pillugt aatsaat taama pitsaatigisumik isumaqatigiissusiortoqartoq, SIK-p siulittaasuata Jess G. Berthelsenip, Sermitsiaq Inuussutinut oqaatigaa.
Sulisoqarnermi illuatungeriit isumaqatigiinniarnerminni aammaarlutik iluatsitsipput ilaasortatta Namminersorlutik Oqartussat suliffiutaanni Royal Greenlandimi sulisut nammaginartumik, pisariaqartumilli, oqaluttuarisaanermi malunnaatilimmik akissarsiamikkut qaffaavigineqartussanngornerisigut, Jess G Berthelsen oqarpoq.
Soraarnerussutisiat tungaasigut aamma pitsanngoriaateqarpoq.
Soraarnerussutisianut ilanngaat akissarsiat 8,23 procentianit akilerneqartalissaaq taakunannga sulisitsisut aappaata pingajoraterutaat akilissallugu, taakkua sinnerat sulisup nammineq akilissavaa.
Sulinerup sivisussusiata naatsorsorneqartarnerat allanngortinneqassaaq, sulisup qaanngiuttorutisisarnissaminut naatsorsuisarnerat pitsaanerulissammat.
