SIK: Aatsitassat uranitallit akuersaarneqanngilluinnarnerat peerneqarli

SIK-p siulittaasuata Jess G. Berthelsenip Naalakkersuisut maanna kajumissaarpai aatsitassat uranitallit akuersaarneqanngilluinnarnerat peeqqullugu. Taassuma taarsiullugu uparuarpaa, aatsitassani pissarsiarineqarsinnaasuni uranitaqartillugu EU-p akuersaarnissamik 0,1-mut annertusisitsinera pimoorullugu Kalaallit Nunaata eqqarsaatigimmagu.
apriilip 13-at 2010 17:30

Jess G. Berthelsenip oqarnera naapertorlugu, SU-mi aalajangersakkat Nunat tamalaat atomimik nukissiuuteqarnermut ataatsimiititaliaata aalajangersagaanut sukangasuunut aamma ilaatinneqarmata, tassa qanorluunniit iliorluni avatangiisinut peqqarniisaarniartoqassanngitsoq, imaluunniit isumannaatsuunissaq pillugu nunat tamalaat aalajangersagaanni akuerisat atornissaat pissanngitsoq.

SIK-p siulersuisuuneri maannakkorpiaq Qaqortumi ataatsimiipput, Jess G. Berthelsenillu Kommune Kujallermi borgmesteri Simon Simonsen peqatigalugu nunatsinni politikerit kajumissaarpai Kujataani aatsitassanik piiaanissat pillugit aalajangeqqullugit.

- Borgmesteri aningaasaqarnikkut ilungersualluinnartoq oqaloqatigaara. Aammalu nunatsinni politikerinit arajutsisimasariaqanngilaat Kujataa tamarmi suliffissanik nutaanik nilliammat, Jess G. Berthelsen ilanngullugu oqarpoq. Erseqqissarpaali aatsitassanut uranitalinnut akuersaarnissap annertusinissaa ima isumaqanngimmat Kalaallit Nunaat uranimik tuniniaalissasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq