Sigguk A/S umiarsuarmik tunisassiorfissamik attartorpoq

Sigguk A/S, Naalakkersuisunit juunip ingerlanerani qaleralittassinneqarmat, Naalakkersuisut piumasaqarput, qaleralittat Aasiannut pinngitsoornani tulaanneqartassasut, tamannalu Sigguk A/S-ip eqquutsinnialerpaa, umiarsuarmik tunisassiorfissamik Aasianni tulasimatinneqartussamik attartornikkut.

- Massakkut ukiallu ingerlanerani tunisassiorfik piareersinnaannginnatsigu, akikinnerpaaq pisariinnerpaarlu qinersimavarput, tassalu umiarsuarmik tunisasssiorfissamik attartorniarluta aalajangersimavugut. Taamatut iliorniarnerput Naalakkersuisut akuerivaat, ullumiinnarlu Naalakkersuisut siulittaasuat sianerpoq akuerisimallugu atsiorsimallugulu.

Royal Greenland suliffeqarfiuvoq, taannalu suliffeqarfiit allat assigalugit isumaqatiginiarsimavarput, immitsinnulli qanillivallaarsimanngilagut, malunnarsimavorlu qanillisinnaasimanata, Frans Heilmann oqarpoq nangillunilu:

- Naalakkersuisut anguniarpaat, qaleralittassiissutit aqqutigalugit Aasianni suliffissaaleqinerup akiorniarneqarnissaa, tamannalu uagut naammassisinnaasimavarput. Aasiaat kommuneat suleqatigilluinnarlugu pilersaarusiorsimavugut, takusinnaanngilaralu allatut aaqqiinissaq.

Nuannaarutigaarput kiffaanngissuseqarluta aaqqiisinnaasimagatta, tamannalu naalakkersuisunit ataqqineqarsimanera nuannaarutigaarput.

Sigguk A/S-imi siunnersorti, Frans Heilmann oqarpoq.

Sigguk A/S-mut 1825 tonsit qaleralittassiissutigineqarput, umiarsuarlu tunisassiorfissatut Aasianni atorneqartussaq taaguuteqarpoq Bjal Senior-imik.