Qeqertarsuup avataani immikkut ittumik qaleralittassiisimanermi agguaassisimaneq pillugu, tassanilu qaleralittassinneqartup Sigguk A/S-ip Aasiaanni umiarsuarmik tunitsiviliilluni tigooqqaaniarnera, Inuit Ataqatigiit Inatsisartuni ilaasortaatitaanit apeqquserneqarpoq.
Suliffeqarfiit Sigguk A/S aamma Nukik Seafood A/S ukioq manna 2.425 tonsinik immikkut ittumik qaleralittassinneqarput, naak Royal Greenland Namminersornerullutik Oqartussanit pigineqartoq pisassinneqarnissamik aamma qinnuteqarsimagaluartoq. Pisassiissutit tamakkerlutik suliffeqarfinnut PolarSeafood-imit nakkutigineqartunut pisassiissutigineqarmata tikkuinnaqqavugut. Kiisalu Naalakkersuisuni siulittaasup aalajangernerata kingorna aalisakkat suliarisinnaaniassammatigit Aasiaanni umiarsuarmik tunitsiviliinissamut maanna isiginnaaginnarpugut, Johan Lund Olsen, Inatsisartuni ilaasortaq IA-meersoq, Naalakkersuisunut Sigguk A/S pillugu katillugit qulingiluanik apeqquteqarnermini taama tunngavilersorpoq.
Aasianni Royal Greenland suliffissuaqareerpoq, naluneqanngilarlu suliffissuit Namminersornerullutik Oqartussanit pigineqartut inuiaqatigiinnit pigineqarmata, taamaattumillu inuiaqatigiinnut pitsaanerpaamik kiffartuussisussaammata, tamanna tupinnanngitsumik apeqqutinik arlalinnik pilersitsisoq, Johan Lund Olsen allappoq.
-Pisassiissutit ilaat Aasiannut tulaanneqartussat Sigguk A/S-imut pisassiissutigineqarnerannut aalajangerniarnermi suut eqqarsaatersuutigineqarsimappat? Aamma:
-Malittarisassat nutaat kingunerissanerpaat, umiarsuit tunitsiviit qaammatialunnguaannarni ingerlasussat akornuteqanngitsumik nunami suliffissuit pioreersut unammillernerisigut atorunnaarsissinnaallugit?
Tamanna Inuiaqatigiit pigisaannik aqutsilluarnissamut naapertuunnerluni? Johan Lund Olsen Inatsisartuni ilaasortaq IA-meersoq, Naalakkersuisunut ilaatigut taama aperaaq.