Sianiutitigut qasusooqqaneq toqutsinermut patsisaavoq
Sianiutitigut qasusoornerup kingunerisaanik, anaanaq 24-nik ukiulik, Ilulissaneersoq, sapaatip akunnerisa marluk matuma siornagut meeqqaminik toqutsivoq.
Allattoq Elisa Isaksen
septembarip 05-at 2008 17:33
- Sianiutiminik qasusooqqanini oqaatigaa, aamma angutaatikuni ajornartorsiutigigamiuk. Mattussaaqasarluni iisartakkaminillu sianiutigissaatinik toqquunneqartarluni, 24-nik ukiullip arnaa oqarpoq.
Alianartumik pisoqarneraniit sapaatip akunneri marluk ingerlareermata, ilaqutariit Ilulissat kommunianit inunnik isumaginnittoqarfimmiit, oqaloqatigineqarnissamik assut pisariaqartitsigaluarput.
- Sapaatip-akunneri marluk ingerlareeraluartut inunnik isumaginnittoqarfimmiit oqaloqateqarnissamut pisariaqartitsinitsinnik aperineqanngilagut.
Ilulissat kommunianiit pisimasoq pillugu Radioaviisimut oqaaseqartoqarusungilaq.
