Sianiginagu vinterdepressionertoqarsinnaavoq

Ukiuukkut nanertisimasarnermik, qallunaatut Vinterdepressionimik taaneqartartumik, Kalaallit Nunaanni eqqugaasartut amerlassusaat kisitsisaatigineqanngilaq.

Nittartakkami netdoktor.dk-mi allaaserineqarsimasoq naapertorlugu, Alaskap inuisa 10 %-iisa tamanna atorsimavaat.

Seqerngup qaamarnganiit pissarsiarisartakkagut taartalernerani pissaaraangatsigit hormonigut allannguuteqartarput, tamatumalu kingunerisinnaavaa nanertisimalerneq.

Ilulissat napparsimaviani tarnikkut erloqissutilinnut angerlarsimaffinni peqqissaasoq Britt Krull, isumaqarpoq sianiginagu vinterdepressionertut nunatsinni amerlasinnaasut.

Vinterdepressioneqarnerup ilisarnaatigisarpaa, nalinginnaasumiit nikallunganerulerneq, ullaakkut makikkusunnginneq, ulluinnarnilu suliarisartakkanut nalinginnaanerpaanut soorlu illulerinissamut, niuerniarnissanut, meeqqanik aallernissamut assigisaannullu nukissaqannginneq suliassanillu kinguartiteriuaannalerneq.

Inuiaqatigiinnut nanertisimanermik eqqugaaneq qanoq akisutiginersoq aperineqarami Britt Krull ima akivoq.

- Soorunami una eqqarsaatigissagaani nanertisimaneq nukissaarunnerlu pissutigalugu sulinngitsoortariaqartarneq, inuiaqatigiinnut eqqugaasumullu akisoqaaq, ingammik ukiut tamaasa qaammatini arlalinni nanertisimasarniaraanni ilaqutariinnermut avatangiiserisanullu sunniutai akisusinnaalluarput, Britt Krull oqarpoq.

Tamanna pingitsoorniarlugu nammineq qanoq iliortoqarsinnaanersoq aperineqarami ima akivoq:

- Nammineq nalunngisakka naapertorlugit, qaamanerani pisuttuarneq, timillu pisariaqartitaminut oqariartuutaannut naalaarneq, minnerunngitsumillu allanngorartunik nerisaqarneq, vitamininillu amigaateqarnaveersaarneq.

Taama oqarpoq Britt krull Ilulissat napparsimaviani tarnikkut erloqissutilinnut angerlarsimaffinni peqqissaasoq.

Ukiukkut nanertisimanermik eqqugaasut qaamaneq atorlugu katsorsarneqartarput, ullormut ½ tiiminiit 1 tiimit missaanut sapaatit akunnerit marluk missaani sivisussuseqartumi.