Ane Hansen: Siammasissumik suleqatigiinnissaq pingaartittorujussuuarput
- Oqaloqatigiilluaratta, aammalu politikkikkut anguniakkavut pingaarutilerujussuartut isigisavut naapeqatigiilluarfigigatsigit taanna toqqissisimaffigivara, aamma kommunissatsinni nutaami sulerusussutsip kommunissatsinni nutaami pitsaasumik aallarteriarnissaanut tamatta siunnerfeqaratta, taanna naapeqatigiilluarfigigatsigu assut isumalluarnarpoq suleqatigiilluarnissaq, Ane Hansen, Inuit Ataqatigiinneersoq, oqarpoq.
Taanna kommuninut apriilip ulluisa sisamaanni qinersinermi 350-init qinerneqarpoq, borgmesterinngortussatullu ilimanarnerpaalluni.
Enok Sandgreenilli, Siumumeersup, Qaasuitsoq Kujallermi borgmesterinngortinneqarnissaanik Siumup Atassutillu isumaqatigiissuteqarsimanerat ippassaq tallimanngornermi nalunaarutigineqarpoq.
Pissutsilli ippassaq unnukkut unnuarlu allanngorput, Ane Hansenillu Qaasuitsoq Kujallermi borgmesterinngornissaa, Siumumi ilaasortat allat arfineq-marluk Inuit Ataqatigiillu isumaqatigiissutigaat:
AAMMA ATUARUK Ane Hansen borgmesterinngortussanngortoq
- Tusagassiorfitsigut nalunaaruteqartoqareernerata kingorna paasisimavarput tunuliaqutani tamakkiisumik peqatiginngikkai, taamaattumik isumaqatigiinniarnerit aallarteqqissimavagut sinneruttut peqatigalugit. Tassalu taanna iluatsilluartutut oqaatigineqarsinnaavoq pissutigalugu tamatta akisussaassuseqarluarluta kommunissatta iluani pitsaasumik aallarteriartoqarnissaa soqutigalugu ukiuni sisamani tulliuttuni anguniagassat eqqarsaatigalugit pitsaasumik oqaloqatigiilluta, Ane Hansen oqarpoq.
Qaasuitsoq Kujallermi avissaartuuttoqannginnissaa isumaqatigiissusiortut aamma pingaartissimavaat:
- Kommunitta avissaartuuffiunnginnissaa pingaartorujussuutissimavarput, kommunissatta tamaat isigalugu, illoqarfiit nunaqarfiillu tamaasa eqqarsaatigalugit pitsaasumik suleriarnissaq, aamma suliassaq annertoorujussuummat siammasissumik suleqatigiinnissaq tamatta pingaartittorujussuusimavarput, Ane Hansen oqarpoq.
AAMMA ATUARUK IA-p Najap kissaatai tamasa neqeroorutigai
Nutaamillu ulluni qaninnerni isumaqatigiissusiortoqaqqinnissaa naatsorsuutiginngikkitsik, taassuma aamma oqaatigaa:
- Ippassaq unnukkut atsioqatigiippugut, taannalu tamatta attakkipput naatsorsuutigilluinnarparput qinigaaffiup sinnera tamaat, Qaasuitsoq Kujallermi borgmesterissatut toqqarneqartoq Ane Hansen, Inuit Ataqatigiinneersoq, taama oqarpoq.
Taassuma Qaasuitsoq Kujallermi borgmesterinngornissani pillugu inatsisartuni ilaasortaanerminit maanna tunuarnissani nalunaarutigaa.
KNR-ip Enok Sandgreen oqaaseqartiniarlugu attaveqarfiginiaraluarpaa, iluatsissinnaasimanaguli.
AAMMA ATUARUK Jess Svanep borgmesterinngunngitsoornini pakatsissutigaa
