Shu-bi-dua 1973-imi pilersinneqarpoq tamatumalu kingorna danskini nipilersortartuni tunisaqarnerpaat ilaaniissimalluni.Assi: Scanpix

Shu-bi-duap erinarsortua toqusoq

Shu-bi-duami ukiorpassuarni erinarsortoq, Michael Bundesen Gentoftemi angerlarsimaffimmini sapaatiummat toqukkut qimaguppoq.

Michael Bundesen nipilersortartuni danskini Shu-bi-duami erinarsortoq piffissami sivikitsumi napparsimareerluni toquvoq.

Ilaqutai tusagassiuutinut taama paasissutissiipput. Michael Bundesen 71-inik ukioqarluni toquvoq.

Michael Bundesen Gentoftemi angerlarsimaffimmini sapaatiummat toqukkut qimaguttoq tusagassiuutinut nalunaarummi allassimavoq.

Ilaqutaasut qaninnerpaat toqukkut qimagunnerani najorpaat.

- Ataatatta Michael Bundesenip sivikitsumik kræftimik napparsimareerluni toqukkut qimagunnerata nalunaarutiginera aliasuutigingaarparput, meeraasa Nanna Bundesenip Nicolaj Bundesenillu nassiussaanni nalunaarummi allassimavoq.

Ilaqutariit ”Michaelimik initoqisumik annaasaqarnerminni ujariatseqinerminnilu eqqissisimaartitaanissartik kissaatigaat”.

Ukiut qulit matuma siorna erinarsortuujunnaartoq

Michael Bundesenip nammineq kissaateqarnera aallaavigalugu ilaqutariit qaniginerpaasat kisimik ilisinermut peqataassapput.

- Naak danskisut amerlasuunut pingaaruteqarsimanera eqqarsaatigalugu nuannaarutaagaluartoq kissaatigineqartoq ataqqineqaqquarput, ilaqutariit allapput.

Michael Bundesenip danskini tusaamaneqarluartuni Shu-bi-duami erinartortartuujunnaartariaqarneranit ukiut qulingajaat qaangiupput.

Qaratsamini taqqaminik marloriarluni milittooreerluni suna tamarmi – aamma Danmarkimi nipilersortartuni tusaamaneqarnerpaat ilaanni erinartortartuuneq naaffeqartariaqartoq siunersinikuuaa.

Ataqqinaammik nersornaaserneqartoq

Shu-bi-dua 1973-imi pilersinneqarpoq tamatumalu kingorna danskini nipilersortartuni tunisaqarnerpaat ilaaniissimalluni.

Inuit amerlanerpaat erinarsuutit ”Den røde tråd”, ”Hvalen Hvalborg” aamma ”Sexchikane” allarpussuillu erinartorsiinnaavaat.

Michael Bundesen 2013-imi Danish Music Awardseqarnerani nipilersornermi ”ataqqinaammik nersornaaserneqarpoq”.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat